يران - يزرايل قاقتىعىسى. تەگەران ءبىر دەمدە سوققىلاۋدى توقتاتۋعا دايىن ەكەنىن مالىمدەدى

يران يزرايلگە قارسى سوققىلاردى توقتاتۋعا دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى. يران سىرتقى ىستەر ءمينيسترى ابباس اراكچي تەگەراندا شەتەلدىك ديپلوماتتار الدىندا ءسوز سويلەپ، يزرايل سوققىلاۋدى توقتاتسا، يران دا قاقتىعىستى توقتاتۋعا دايىن ەكەنىن جەتكىزدى. ءمينيستردىڭ ايتۋىنشا، تەگەران ءوز ارەكەتتەرىن تەك ء«وزىن-ءوزى قورعاۋ» شەڭبەرىندە جۇزەگە اسىرىپ وتىر جانە قاقتىعىستىڭ ايماقتاعى باسقا ەلدەرگە تارالۋىن قالامايدى. اراكچي اقش-تى ءيزرايلدىڭ سوققىلارىنا كومەكتەستى دەپ ايىپتاۋدا. مينيستر بۇل ارەكەتتىڭ يران مەن اقش اراسىنداعى يادرولىق كەلىسسوزدەردى بۇزۋ ماقساتىندا جاسالعانىن ايتتى. كەلىسسوزدەردىڭ كەلەسى كەزەڭى بۇگىن ءوتۋى ءتيىس ەدى. الايدا زىمىراندىق شابۋىلدارعا بايلانىستى ول كەيىنگە قالدىرىلعان. يران تاراپى يادرولىق قارۋعا ۇمتىلمايتىنىن راستايتىن كەلىسىم جاساۋعا ءازىر ەكەنىن، بىراق بۇل قۇجات يراننىڭ «يادرولىق قۇقىقتارىن» شەكتەمەۋى كەرەكتىگىن اتاپ ءوتتى. اقش پرەزيدەنتى دونالد ترامپ ۆاشينگتوننىڭ يرانعا جاسالعان شابۋىلدارعا قاتىسى جوق ەكەنىن ايتىپ، يرانمەن يادرولىق كەلىسىمگە كەلۋگە شاقىردى. ال گەرمانيا، فرانتسيا جانە ۇلىبريتانيا يرانمەن كەلىسسوزدەردى «دەرەۋ» باستاۋعا دايىن ەكەندەرىن مالىمدەدى. ايتا كەتەيىك، ەكى ەلدە دە بەيبىت تۇرعىندار اراسىندا قازا تاپقاندار مەن زارداپ شەككەندەر بار.