رەسەيلىك پروديۋسەر، شوۋبيزنەس وكىلى يانا رۋدكوۆسكايا 29 ءساۋىر كۇنى استانا قالاسىنداعى حالىققا قىزمەت كورسەتۋ ورتالىعىنا بارىپ، مەملەكەتتىك قىزمەتكە جۇگىنگەن. ونىڭ بۇل ساپارى كوپشىلىكتىڭ نازارىن اۋداردى، دەپ حابارلايدى "ادىرنا" ۇلتتىق پورتالى.
اسىرەسە، رۋدكوۆسكايانى "ازاماتتارعا ارنالعان ۇكىمەت" توراعاسى ارمان كەنجەعاليەۆتىڭ ءوزى جەكە ەرتىپ جۇرگەنى الەۋمەتتىك جەلىدە قىزۋ پىكىرتالاس تۋعىزدى.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ رەسمي حابارلاۋىنشا، رۋدكوۆسكايا – قازاقستاندا دۇنيەگە كەلگەن، اتا جۇرتىنا ءجيى كەلىپ تۇراتىن ازامات. بۇل جولعى ساپارىنىڭ ماقساتى – جىلجىمايتىن مۇلىك ساتىپ الۋعا بايلانىستى قۇجات راسىمدەۋ. پروديۋسەر ەلدەگى تسيفرلاندىرۋ دەڭگەيى مەن حقكو قىزمەتىنە جوعارى باعا بەرىپ، قازاقستاندىق سەرۆيستىڭ ساپاسىنا ريزا بولعانىن جەتكىزدى. ەلدەگى قىزمەتتى "زاماناۋي ءارى جىلدام" دەپ باعالاعان.
«مۇنداي زاماناۋي ءارى جىلدام قىزمەت كورسەتۋ جۇيەسىن ءار ەلدەن كەزدەستىرە بەرمەيسىڭ. كورسەتىلگەن قىزمەت پەن تسيفرلىق شەشىمدەر ماعان وتە ۇنادى»، – دەدى يانا رۋدكوۆسكايا.
الايدا بۇل ءسات جەلىدە ەكىۇشتى پىكىر تۋدىردى. ءبىرى: «قازاقستانعا قوش كەلدىڭ!»، «وتانىنان الىستاماعانى قۋانتادى» دەپ جىلى لەبىزىن بىلدىرسە، ەكىنشى تاراپ «نەگە قاراپايىم حالىققا مۇنداي قۇرمەت كورسەتىلمەيدى؟»، «جەكە قىزمەت پە بۇل؟» دەگەن مازاسىز سۇراقتارىن جاۋدىردى.
كەيبىر قولدانۋشىلار حقكو-دا ۇزاق كەزەك كۇتىپ، كەيدە مامانداردان ماردىمدى جاۋاپ الا الماي جاتاتىندارىن دا ايتقان.
