رەسەي ۇكىمەتى ينتەرنەت ارقىلى ءموبيلدى جانە ستاتسيونارلىق تەلەفوندارعا قوڭىراۋ شالۋعا تىيىم سالدى. بۇل شەشىم رەسمي تۇردە تەلەفون الاياقتارىنا قارسى كۇرەس ماقساتىندا قابىلدانعان، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
الايدا، بۇل شەكتەۋ رەسەيدە 2023 جىلدىڭ جەلتوقسانىندا باستالعان بانكوماتتاردى، پوليتسيا كولىكتەرىن جانە باسقا دا نىسانداردى ورتەۋ تولقىنى اياسىندا ەنگىزىلىپ وتىر. تۇتقىندالعاندار قىلمىس جاساۋعا الاياقتاردىڭ ماجبۇرلەگەنىن ايتقان.
28 جەلتوقساندا جاريالانعان قاۋلىعا سايكەس، بايلانىس قىزمەتتەرىن كورسەتۋ ليتسەنزيالارى تىزىمىنەن «داۋىس اقپاراتىن بەرۋ فۋنكتسياسى بار ينتەرنەت دەرەكتەرىن تاراتۋ ليتسەنزياسى» الىنىپ تاستالادى. ۇكىمەتتىڭ مالىمدەۋىنشە، بۇل تەحنولوگيا نومىرلەردى اۋىستىرۋعا مۇمكىندىك بەرىپ، تەلەفون الاياقتارى تاراپىنان ءجيى قولدانىلعان.
«بۇل شارا تەلەفون الاياقتىق ارەكەتتەرىن ايتارلىقتاي شەكتەيدى»، — دەپ مالىمدەدى ۇكىمەت وكىلدەرى.
شەكتەۋ مەسسەندجەرلەر اراسىنداعى قوڭىراۋلارعا اسەر ەتپەيدى. ۇكىمەتتىڭ حابارلاۋىنشا، شەشىم قاراپايىم پايدالانۋشىلارعا قيىندىق تۋعىزبايدى.
«مەسسەندجەرلەر ارقىلى بايلانىس ورناتاتىن ادامدار بۇل قىزمەتتى ينتەرنەت جەلىسى ارقىلى تىكەلەي قولدانا بەرەدى، ءموبيلدى نەمەسە ستاتسيونارلىق بايلانىس جەلىسىنە شىعۋ قاجەت ەمەس»، — دەلىنگەن ۇكىمەت حابارلاماسىندا.
قازىرگى ۋاقىتتا Zoom نەمەسە Skype سياقتى قىزمەتتەر ارقىلى ينتەرنەتتەن ءموبيلدى جانە ستاتسيونارلىق تەلەفوندارعا قوڭىراۋ شالۋعا بولادى. بۇل قىزمەتتەردى رەسەيدەن ەميگراتسيالاعاندار مەن تسەنزۋراعا بايلانىستى شەتەلدە جۇمىس ىستەپ جۇرگەن جۋرناليستەر دە پايدالانىپ كەلگەن.
ۇكىمەت قاۋلىسى 2025 جىلدىڭ 1 قىركۇيەگىندە كۇشىنە ەنەدى.
