استاناداعى ۇلتتىق ۇلان اسكەري بولىمىندە بورىشىن وتەپ جۇرگەن سارباز اۋرۋحاناعا ءتۇسىپ، تۋعان اناسىن تانىماي قالعان، دەپ حابارلايدى “ادىرنا” ۇلتتىق پورتالى.
كتك ارناسىنىڭ حابارلاۋىنشا، دينا ءجۇسىپوۆا ۇلىنىڭ وعان سەنبەيتىنىن ايتادى. سوندىقتان نە بولعانىن اشىپ تۇسىندىرمەيدى ەكەن.
"ول مەنى تانىمايدى. ماعان سەنبەيدى، اشىلىپ ايتپايدى. مەن ۇلىمدى، ساربازدى بورىشىن وتەۋگە جىبەردىم، اۋرۋحانادا جاتۋ ءۇشىن ەمەس. مۇگەدەك بولىپ قالدى دەۋگە بولادى. ەشتەڭەنى تۇسىنبەيدى", – دەدى اناسى دينا ءجۇسىپوۆا.
سارباز اۋرۋحاناعا جەكسەنبى كۇنى تۇسكەن، سول كۇنى-اق اتا-اناسىنا ونىڭ جاعدايى تۋرالى ەسكەرتىلىپتى. دينا ءجۇسىپوۆا استاناعا دۇيسەنبى كۇنى كەلگەنىمەن، ۇلىن تەك كەشكە عانا كورىپتى. سوزىنشە، دارىگەرلەر ۇلىنا نە بولعانىن بىلمەيدى.
"ەرنار سەنى بىرەۋ ۇردى ما؟ سەرجانت ۇردى ما؟ ايتشى، مەن ساعان كومەكتەسەمىن. جاعدايى وسىنداي", – دەيدى ول.
اسكەري بولىمدە ساربازدىڭ كەشكى استان كەيىن باسپالداقپەن كوتەرىلىپ كەلە جاتىپ ەسىنەن تانعانىن ايتادى. ۇرىپ-سوعۋ دەرەگىن جوققا شىعارىپ وتىر. ءبولىم كومانديرىنىڭ ورىنباسارى ساربازعا "تالما سيندرومى" قويىلعانىن مالىمدەدى.
"دەنەسى تەكسەرىلدى، ەشقانداي جاراقات انىقتالعان جوق. بولعان جاعداي تۋرالى ساربازدىڭ اتا-اناسىنا جانە قۇزىرلى ورگاندارعا ەسكەرتىلدى. قازىر ءبولىم ىشىندە قىزمەتتىك تەكسەرىس، تەرگەۋ ءجۇرىپ جاتىر", – دەدى ۇلتتىق ۇلان №5575 اسكەري ءبولىمى كومانديرىنىڭ ورىنباسارى ايداربەك جۇسىپبەكوۆ.
