22 ماۋسىم كۇنى ورال قالاسىندا بەلگىلى قازاقستاندىق جۋرناليست لۇقپان احمەدياروۆ ۇستالدى، دەپ حابارلايدى "ادىرنا" ۇلتتىق پورتالى.
لۇقپان احمەدياروۆ - «ۋرالسكايا نەدەليا» گازەتىنىڭ بۇرىنعى باس رەداكتورى، قازىرگى «پروستو جۋرناليستيكا» YouTube ارناسىنىڭ اۆتورى ءارى جۇرگىزۋشىسى.
ءجۋرناليستىڭ ايتۋىنشا، پوليتسيا ونىڭ كولىگىن ساقتاندىرۋ ءپوليسىنىڭ بولماۋىنا بايلانىستى توقتاتقان. الايدا كەيىن وعان رف سۇراۋى بويىنشا مەملەكەتارالىق ىزدەۋدە جۇرگەنى حابارلانعان.
احمەدياروۆ پوليتسيا قىزمەتكەرلەرى وزىنە رەسەيدە قىلمىستىق كودەكستىڭ 207.3-بابى («رەسەي ارمياسى تۋرالى جالعان اقپارات تاراتۋ») بويىنشا ءىس قوزعالعانىن ايتقانىن جەتكىزدى. ول مۇنداي ءىس تۋرالى تەك ۇستالعان كۇنى بىلگەنىن جانە رەسەيگە سوڭعى رەت 2016 جىلى بارعانىن مالىمدەدى.
جۋرناليست مەديتسينالىق تەكسەرۋدەن ءوتىپ، كەيىن پوليتسيا باسقارماسىنا جەتكىزىلگەن. ادۆوكاتىنىڭ سوزىنشە، احمەدياروۆتىڭ ءىس بويىنشا قانداي دا ءبىر پروتسەسسۋالدىق مارتەبەسى بولماعان.
كەيىن باتىس قازاقستان وبلىستىق پوليتسيا دەپارتامەنتى ءجۋرناليستىڭ ساقتاندىرۋسىز كولىك باسقارعانى ءۇشىن اكىمشىلىك جاۋاپكەرشىلىككە تارتىلعانىن راستادى. ال رەسەي جاريالاعان ىزدەۋ تۋرالى اقپاراتقا تۇسىنىكتەمە بەرمەدى.
لۇقپان احمەدياروۆ سوڭعى جىلدارى ۋكرايناداعى جاعداي تۋرالى رەپورتاجدار دايىنداپ، رەسەيدىڭ ۋكرايناداعى سوعىسىنا قاتىستى ماتەريالدار جاريالاپ كەلەدى. رەسەي زاڭناماسىنداعى اتالعان باپ بويىنشا ەڭ جوعارى جازا بەس جىلعا دەيىن باس بوستاندىعىنان ايىرۋدى كوزدەيدى.
