تۇلعالار قالىپتاساتىن ءۇي. SOS جاسوسپىرىمدەرگە ارنالعان جاڭا ءۇي اشىلدى

استانادا SOS بالالار اۋىلىنىڭ قامقورلىعىنداعى جاستاردىڭ وزدىگىنەن ءومىر ءسۇرۋدى ۇيرەنۋىنە، جاۋاپكەرشىلىك پەن تاۋەلسىزدىككە باۋلۋعا ارنالعان ەرەكشە الەۋمەتتىك جوبا – توپتىق ينتەگراتسيالىق جاسوسپىرىمدەر ءۇيى اشىلدى. بۇل باستاما جاسوسپىرىمدەرگە جىلى ءارى قاۋىپسىز ورتادا بولاشاققا سەنىمدى قادام جاساۋعا مۇمكىندىك بەرەدى. جوبا تيمۋر قۇلىباەۆتىڭ Halyk قايىرىمدىلىق قورىنىڭ كومەگىمەن جۇزەگە استى. قور وسى ماقسات ءۇشىن جالپى اۋدانى 370 شارشى مەتردى قۇرايتىن ەكى كەڭ پاتەردى تابىستادى. جاڭا ءۇي جاسوسپىرىمدەردىڭ دەربەس ءارى جاۋاپتى ەرەسەك ومىرگە قادام باسۋىندا ماڭىزدى ءرول اتقارادى. مۇندا جاستار تاربيەشى-اتا-انالارمەن بىرگە تۇرىپ، ءوز بەتىمەن ءومىر ءسۇرۋدى، جاۋاپكەرشىلىكتى سەزىنۋدى جانە قالالىق ورتادا بەيىمدەلۋدى ۇيرەنەدى. جاڭا ءۇيدىڭ جاعدايى وتباسىلىق ورتاعا بارىنشا جاقىنداتىلعان: جايلى بولمەلەر، وقۋ، دەمالىس جانە كۇندەلىكتى تۇرمىسقا قولايلى بارلىق جاعدايلار قاراستىرىلعان. «SOS بالالار اۋىلدارىمەن بىرلەسىپ، ءبىز الماتى مەن قاراعاندى قالالارىندا دا وسىنداي بىرنەشە جوبانى ىسكە اسىردىق. بۇل جوبالار بالالار مەن وتباسىلاردىڭ قالالىق ورتادا، ءۇيدىڭ جىلۋلىعى مەن جايلىلىعى جاعدايىندا دامۋىنىڭ قانشالىقتى ماڭىزدى ەكەنىن دالەلدەدى»، - دەيدى Halyk قايىرىمدىلىق قورىنىڭ ديرەكتورى ساعىنبەك شۇڭكەەۆ. ينتەگراتسيالىق جاسوسپىرىمدەر ءۇيى – جاستاردىڭ ەرەسەك ومىرگە سەنىمدى جانە قاۋىپسىز قادام جاساۋىنا مۇمكىندىك بەرەدى ينتەگراتسيالىق جاسوسپىرىمدەر ءۇيىنىڭ فورماتى جاسوسپىرىمدەردىڭ قالا جاعدايىندا ەرەسەك ومىرگە جەڭىل ءارى قاۋىپسىز وتۋىنە باعىتتالعان. مۇندا جاستاردىڭ الەۋمەتتىك بەيىمدەلۋى مەن قوعامعا ينتەگراتسيالانۋى ءۇشىن مۇمكىندىكتەر جاسالعان. ولار ءاردايىم پەداگوگتار مەن SOS بالالار اۋىلى ماماندارىنىڭ قولداۋىنا سۇيەنە الادى. «SOS قازاقستان بالالار اۋىلدارى» كورپوراتيۆتىك قورىنىڭ ۇلتتىق ديرەكتورى گۇلجان اسانوۆا بۇل جوبا تۋرالى بىلاي دەيدى: «جاسالعان زاماناۋي ءارى قولايلى جاعدايلار – تابىستى وقۋ، دەمالىس جانە كۇندەلىكتى ءومىر ءۇشىن ۇلكەن مۇمكىندىكتەر اشادى. مۇنداي ورتا جاسوسپىرىمدەرگە دۇرىس قۇندىلىقتار مەن ومىرلىك نورمالار تۋرالى تۇسىنىك قالىپتاستىرادى. بۇل، ءوز كەزەگىندە، ولاردىڭ وزدىگىنەن ءومىر ءسۇرىپ، سۇرانىسقا يە جانە باسەكەگە قابىلەتتى ماماندىق يەسى بولۋعا، ءوز جولىن تابۋعا دەگەن ۇمتىلىسىن ارتتىرادى». ومىرگە بەيىمدەلۋدىڭ العاشقى قادامدارى: بىرنەشە جىل ىشىندە جاستار:

• قالالىق ورتادا ەركىن ءجۇرىپ-تۇرۋدى،
• مەملەكەتتىك قىزمەتتەردى قولدانۋدى (ەمحانالارعا بارۋ، حقكو قىزمەتتەرىن پايدالانۋ),
• ءوز قارجىسىن ساۋاتتى باسقارۋدى،
• بولاشاقتى سانالى تۇردە جوسپارلاۋدى ۇيرەنەدى.

جاستار SOS بالالار اۋىلىنىڭ قامقورلىعىنان شىققان كەزدە وزدەرىنە سەنىمدى بولىپ، قازاقستانداعى ءاربىر ەرەسەك ازامات كۇندەلىكتى كەزدەسەتىن ماسەلەلەردى ءوز بەتىمەن شەشۋگە تولىق دايىن بولادى. ولار ءوز ءومىرىنىڭ جاۋاپكەرشىلىگىن ءوز قولىنا الىپ، بولاشاعىن سەنىمدى تۇردە قالىپتاستىرا الادى. 17 جاستاعى كريستينا جاڭا باسپانا تۋرالى اسەرىمەن ءبولىستى: «پاتەردى العاش كورۋگە كەلگەن ساتتە قۋانىشىمىزدا شەك بولمادى. شاماسى، كورشىلەر ءبىزدىڭ سونشا شاتتانعانىمىزعا تاڭ قالعان دا شىعار. بىراق بۇل ءبىز ءۇشىن ۇلكەن قۋانىش ەدى. ءۇيدى كورگەن بويدا قىزدارمەن ءبىر شەشىمگە كەلدىك: ەندى تاڭ سايىن قوناق بولمەسىندە باس قوسىپ، ءبىر شىنى كوفە ىشەمىز — تۋرا كينوداعىداي! «SOS قازاقستان بالالار اۋىلدارى» كورپوراتيۆتىك قورى — 1994 جىلى قۇرىلعان كوممەرتسيالىق ەمەس ۇيىم. قور اتا-انا قامقورلىعىنسىز قالعان نەمەسە سونداي قاۋىپ الدىندا تۇرعان بالالار مەن جاستاردى قامقورلىعىنا الادى. 30 جىل ىشىندە قازاقستانداعى SOS بالالار اۋىلدارىندا 900-دەن استام بالا مەن ءجاسوسپىرىم تاربيەلەندى جانە ءومىر ءسۇرىپ جاتىر. سونداي-اق 2500-دەن استام بالا الەۋمەتتىك جوبالار اياسىندا كەشەندى قولداۋ الدى. قور الماتى، استانا، قاراعاندى جانە تەمىرتاۋدا جۇمىس ىستەيدى. سونىمەن قاتار، تيمۋر قۇلىباەۆتىڭ Halyk قورى قولداۋىمەن ىسكە اسىرىلاتىن وتباسىلىق ۇلگىدەگى بالالار اۋىلدارىنىڭ ۇيلەستىرۋ كەڭەسى جوباسى اياسىندا بۇكىل قازاقستان بويىنشا بالالار ينتەرنات مەكەمەلەرىنە ادىستەمەلىك كومەك كورسەتەدى. Halyk قايىرىمدىلىق قورى، تيمۋر جانە دينارا قۇلىباەۆتاردىڭ باستاماسىمەن 2016 جىلى قۇرىلعان. بۇگىنگى كۇنگە دەيىن قور 85 ميلليارد تەڭگەدەن استام سوماعا 120-دان استام الەۋمەتتىك جوبانى تابىستى جۇزەگە اسىردى.