رەسەي سيريانىڭ جاڭا ۇكىمەتىنىڭ رەسەيگە قاشىپ كەتكەن پرەزيدەنت باشار اسادتى ەكستراديتسيالاۋ تۋرالى وتىنىشىنەن باس تارتتى. بۇل ءوتىنىش رەسەي بيلىگىنە قاڭتار ايىندا جىبەرىلدى. بۇل تۋرالى سيريانىڭ ۋاقىتشا پرەزيدەنتى جانە جيھادشىلاردىڭ حايات تاحرير اش-شام (HTS) توبىنىڭ جەتەكشىسى احمەد اش-شاراا 23 ءساۋىر كۇنى The New York Times گازەتىنە بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
الايدا، باس تارتقانعا قاراماستان، سيريانىڭ جاڭا اكىمشىلىگى رەسەيمەن قارىم-قاتىناستى ۇزگىسى كەلمەيدى. باسىلىمنىڭ جازۋىنشا، سيريالىق بيلىك كرەملمەن كەلىسسوزدەرگە اشىق.
«رەسەي – بۇۇ قاۋىپسىزدىك كەڭەسىنىڭ تۇراقتى مۇشەسى. سونداي-اق، سيريانىڭ قارۋى تولىعىمەن رەسەيلىك. ودان بولەك، سيريا ۇزاق جىلدار بويىنا سۇيەنگەن ازىق-تۇلىك پەن ەنەرگيامەن قامتاماسىز ەتۋ بويىنشا كوپتەگەن كەلىسىمدەر بار
»، – دەدى اش-شاراا.
ول ءوز ۇكىمەتىنىڭ سيريانىڭ ۇلتتىق مۇددەلەرىن ەسكەرەتىنىن اتاپ ءوتتى.
سيرياداعى ازاماتتىق سوعىس كەزىندە رەسەي اساد رەجيمىن قولداۋ ءۇشىن اسكەر، اسكەري كەڭەسشىلەر، ۇشاقتار مەن كەمەلەر جىبەرگەنى بەلگىلى، دەپ ەسكە سالادى باسىلىم.
«بىزگە باسقا ەلدەردەن سيريالىق قارۋ-جاراقتى الماستىرۋ جونىندە ۇسىنىس تۇسكەن جوق. سوندىقتان رەسەيدىڭ قولداۋى ءالى دە قاجەت بولۋى مۇمكىن»، – دەدى اش-شاراا.
