وزبەكستاننىڭ ناۋاي وبلىسىنىڭ كانيمەح اۋدانىندا جاساندى جاۋىن-شاشىنعا ارنالعان قوندىرعىلار ورناتىلدى. بۇل تۋرالى Fermer.uz Telegram ارناسى جازدى، دەپ حابارلايدى “ادىرنا” ۇلتتىق پورتالى.
وزبەكستاندا العاش رەت ورناتىلعان بۇل جاڭبىر شاقىرۋ قۇرىلعىسى اۋدان اكىمىنىڭ (حوكيم) باستاماسىمەن، ياعني رۋسلان رۋزيەۆتىڭ ۇسىنىسىمەن جەتكىزىلگەن. جوبا قازاقستانداعى حالىقارالىق كليماتتىق وزگەرىستەر تەحنولوگيالارى ورتالىعىمەن (ICCCT) بىرلەسىپ جۇزەگە اسىرىلۋدا.
«بۇل قۇرىلعى اتموسفەراداعى تابيعي پروتسەستەرگە اسەر ەتۋ ارقىلى بۇلتتار مەن جاڭبىر تۋدىرۋعا مۇمكىندىك بەرەدى. تەحنولوگيا وزبەكستاندا العاش رەت قولدانىلىپ وتىر، ونىڭ باستى ماقساتى – قۇرعاقشىلىقپەن ءتيىمدى كۇرەسۋ جانە جايىلىمداردىڭ جاعدايىن جاقسارتۋ»، – دەلىنگەن حابارلامادا.
قوندىرعى مال شارۋاشىلىعى مەن اۋىل شارۋاشىلىعىن سۋ كوزدەرىنە تاۋەلدىلىكتەن ارىلتۋعا، جايىلىمداردى جاقسارتۋعا جانە ونىمدىلىكتى ارتتىرۋعا كومەكتەسەدى دەپ كۇتىلۋدە.
ايتا كەتسەك، 2021 جىلدىڭ كۇزىنە قاراي قازاقستاندا دا جاساندى جاڭبىر شاقىرۋ تەحنولوگياسى ەنگىزىلە باستادى. «بۇل تەحنولوگيانىڭ نەگىزىندە اۋانى ەلەكترلىك يونداۋ ءادىسى جاتىر، ياعني يون گەنەراتورلارى ارقىلى ەلەكتروندار تاراتىلادى»، – دەپ تۇسىندىرگەن بولاتىن Central Asian Center of Climate Change Technologies كومپانياسى.
بۇل قۇرىلعى بار بۇلتتىلىقتى بىرتىندەپ كۇشەيتىپ، جاۋىن-شاشىن تۋدىرۋعا مۇمكىندىك بەرەدى. جىلدىق ورتاشا جاۋىن-شاشىن مولشەرى كەمىندە 30%-عا ارتۋى ءتيىس.
وسىعان وراي بىرنەشە كۇن بۇرىن وزبەكستانعا بارعان ونەرتاپقىش، جاساندى جاڭبىر جاۋعىزۋ تەحنولوگياسىنىڭ اۆتورى التاي اينابەك تە بۇل جوباعا اتسالىسقانىن مالىمدەدى.
“ناۋاي وبلىسىندا 2025 جىلدىڭ 20 ساۋىرىندە العاشقى رەت ىسكە قوسىلعان ءبىزدىڭ تەحنولوگيامىز جاساندى جاۋىن نىشان بەردى. جاقسى بەلگى. سوڭعى جىلدارى وزبەكستاننىڭ قۋاڭشىلىقتان زارداپ شەگىپ كەلە جاتقان شارۋالارىنا كومەككە شاقىرتۋ الىپ، جۇمىستارىمىزدى باستادىق. قۇداي ءساتىن سالسىن، بەرەكەلى جاڭبىرلار بولسىن”،– دەپ جازدى ول.
ەسكە سالساق، بىلتىر ورتالىق ازيانىڭ سۋعا مۇقتاج، تۇرعىن سانى كوپ ەلىنىڭ ءبىرى وزبەكستاندا اۋادان اۋىز سۋ وندىرەتىن جاڭا تەحنيكا سىناقتان وتكەن بولاتىن.
