Ózbekstannyń Naýaı oblysynyń Kanımeh aýdanynda jasandy jaýyn-shashynǵa arnalǵan qondyrǵylar ornatyldy. Bul týraly Fermer.uz Telegram arnasy jazdy, dep habarlaıdy “Adyrna” ulttyq portaly.
Ózbekstanda alǵash ret ornatylǵan bul jańbyr shaqyrý qurylǵysy aýdan ákiminiń (hokım) bastamasymen, ıaǵnı Rýslan Rýzıevtiń usynysymen jetkizilgen. Joba Qazaqstandaǵy Halyqaralyq Klımattyq Ózgerister Tehnologııalary Ortalyǵymen (ICCCT) birlesip júzege asyrylýda.
«Bul qurylǵy atmosferadaǵy tabıǵı proesterge áser etý arqyly bulttar men jańbyr týdyrýǵa múmkindik beredi. Tehnologııa Ózbekstanda alǵash ret qoldanylyp otyr, onyń basty maqsaty – qurǵaqshylyqpen tıimdi kúresý jáne jaıylymdardyń jaǵdaıyn jaqsartý», – delingen habarlamada.
Qondyrǵy mal sharýashylyǵy men aýyl sharýashylyǵyn sý kózderine táýeldilikten aryltýǵa, jaıylymdardy jaqsartýǵa jáne ónimdilikti arttyrýǵa kómektesedi dep kútilýde.
Aıta ketsek, 2021 jyldyń kúzine qaraı Qazaqstanda da jasandy jańbyr shaqyrý tehnologııasy engizile bastady. «Bul tehnologııanyń negizinde aýany elektrlik ıondaý ádisi jatyr, ıaǵnı ıon generatorlary arqyly elektrondar taratylady», – dep túsindirgen bolatyn Central Asian Center of Climate Change Technologies kompanııasy.
Bul qurylǵy bar bulttylyqty birtindep kúsheıtip, jaýyn-shashyn týdyrýǵa múmkindik beredi. Jyldyq ortasha jaýyn-shashyn mólsheri keminde 30%-ǵa artýy tıis.
Osyǵan oraı birneshe kún buryn Ózbekstanǵa barǵan ónertapqysh, jasandy jańbyr jaýǵyzý tehnologııasynyń avtory Altaı Aınabek te bul jobaǵa atsalysqanyn málimdedi.
“Naýaı oblysynda 2025 jyldyń 20 sáýirinde alǵashqy ret iske qosylǵan bizdiń tehnologııamyz jasandy jaýyn nyshan berdi. Jaqsy belgi. Sońǵy jyldary Ózbekstannyń qýańshylyqtan zardap shegip kele jatqan sharýalaryna kómekke shaqyrtý alyp, jumystarymyzdy bastadyq. Qudaı sátin salsyn, berekeli jańbyrlar bolsyn”,– dep jazdy ol.
Eske salsaq, byltyr Ortalyq Azııanyń sýǵa muqtaj, turǵyn sany kóp eliniń biri Ózbekstanda aýadan aýyz sý óndiretin jańa tehnıka synaqtan ótken bolatyn.
