ماجىلىستە وتكەن وتىرىستا ەكولوگيا جانە تابيعي رەسۋرستار ۆيتسە-ءمينيسترى مانسۇر وشۇرباەۆ كاسپي تەڭىزىن زەرتتەۋ بويىنشا جوسپارلار تۋرالى ايتتى، دەپ حابارلايدى "ادىرنا" ۇلتتىق پورتالى.
مانسۇر وشۇرباەۆ كاسپي تەڭىزىن لاستانۋدان قورعاۋ جانە ونىڭ بيولوگيالىق الۋان تۇرلىلىگىن ساقتاۋ ماقساتىندا ازەربايجان، قازاقستان جانە تۇرىكمەنستاندا "كاسپي تەڭىزىنىڭ ەكوجۇيەسىن قالپىنا كەلتىرۋ: لاستانۋدى باسقارۋ جانە بيولوگيالىق ارتۇرلىلىكتى ساقتاۋ الەۋەتىن ارتتىرۋ" جوباسى ىسكە اسىرىلاتىنىن ايتتى. جوبا گلوبالدىق ەكولوگيالىق قوردىڭ گرانتتىق قاراجاتى ەسەبىنەن جۇزەگە اسىرىلادى.
وتىرىستاعى انىقتامالىق اقپاراتقا سايكەس، جوبا 5 جىل ىشىندە جۇزەگە اسادى، جالپى قارجىلاندىرۋ كولەمى – 12 ميلليون دوللار.
"جوبانى بۇۇ-نىڭ جوبالاردى باسقارۋ قىزمەتى (يۋنوپس) دۇنيەجۇزىلىك بانك جانە يۋنەپ-پەن بىرلەسىپ ىسكە اسىرادى. جوبانىڭ قۇرىلىمدىق ەلەمەنتتەرىن كەلىسە اياقتاۋ ءۇشىن 2025 جىلعى 24-26 ءساۋىر ارالىعىندا اقتاۋدا يۋنوپس جانە دۇنيەجۇزىلىك بانك ميسسياسىمەن كونسۋلتاتسيالار وتكىزۋ جوسپارلانىپ وتىر", – دەدى ۆيتسە-مينيستر.
ونىڭ ايتۋىنشا، سونىمەن قاتار گلوبالدىق ەكولوگيالىق قوردىڭ گرانتى ەسەبىنەن قازاقستاننىڭ كاسپي تەڭىزىندەگى بولىگىن قامتيتىن جەكە جوبانى ىسكە اسىرۋ ماسەلەسى قاراستىرىلۋدا.
"بۇل جوبا “قازاقستاننىڭ كاسپي تەڭىزى بولىگىنىڭ جانە وعان ىرگەلەس اۋماقتاردىڭ تەڭىز جانە جاعالاۋداعى رەسۋرستارىن كەشەندى باسقارۋ” دەپ اتالادى. قارجىلاندىرۋ كولەمى – 8 ميلليون دوللار. سونىمەن بىرگە كاسپي تەڭىزى جاعالاۋىن بەيىمدەۋ جوباسىن جۇزەگە اسىرۋ ءۇشىن بەيىمدەلۋ قورىنان قاراجات تارتۋ مۇمكىندىگى بار (بۇۇ-حابيتاتپەن بىرلەسىپ). ءۇش ونلاين كەزدەسۋ وتكىزىلدى. جوبانىڭ شامامەن قۇنى – 10 ميلليون دوللار. قازىر جوبا تۇجىرىمداماسىنىڭ تۇپكىلىكتى نۇسقاسى ازىرلەنىپ، ءتيىستى مەملەكەتتىك ورگاندارمەن، سونىڭ ىشىندە جەرگىلىكتى اكىمدىكتەرمەن كەلىسۋگە دايىندالۋدا", – دەپ قورىتىندىلادى مانسۇر وشۇرباەۆ.
