رەسەيدىڭ ۆلاديمير وبلىسىنداعى كيرجاچ اۋدانىندا ورنالاسقان اسكەري ءبولىم اۋماعىندا وق-دارىلەردىڭ دەتوناتسياسىنان كەيىن جارىلىس بولدى، دەپ حابارلايدى "ادىرنا" ۇلتتىقق پورتالى DW-گە سىلتەمە جاساپ.
رەسەي قورعانىس مينيسترلىگى جارىلىستىڭ قاۋىپسىزدىك تالاپتارىنىڭ بۇزىلۋىنان بولعانىن مالىمدەپ، كىنالىلەر جاۋاپقا تارتىلاتىنىن ايتتى. ءورتتى سوندىرۋگە اسكەري ءبولىم مەن تجم ماماندارى جۇمىلدىرىلعان.
Telegram-داعى Astra ارناسىنىڭ حابارلاۋىنشا، جارىلىس بارسوۆو كەنتىنىڭ جانىندا ورنالاسقان قورعانىس مينيسترلىگىنىڭ باس زىمىران-ارتيللەريالىق باسقارماسىنا قاراستى 51-ءشى ارسەنال اۋماعىندا بولعان. ۋكراينالىق Defence Express اسكەري پورتالى بۇل قويمانىڭ جالپى اۋماعى شامامەن 3,5 شارشى شاقىرىم ەكەنىن اتاپ ءوتتى.
كيرجاچ اۋدانىندا توتەنشە جاعداي جاريالاندى. ۆلاديمير وبلىسىنىڭ گۋبەرناتورى الەكساندر اۆدەەۆتىڭ ايتۋىنشا، جارىلىستار ىقتيمال قاۋىپ ءتوندىرۋى مۇمكىن اۋماقتاردان تۇرعىنداردى ەۆاكۋاتسيالاۋ جۇرگىزىلىپ جاتىر، بارلىق توتەنشە قىزمەتتەر جۇمىلدىرىلعان.
Baza Telegram-ارناسى اسكەري ءبولىم اۋماعىندا 10-11 جارىلىس بولعانىن حابارلادى.
الدىن الا مالىمەت بويىنشا، وق-دارىلەردىڭ جارىلۋى سالدارىنان اسكەري بولىمدە زارداپ شەككەندەر جوق. الايدا ءبىر جەرگىلىكتى تۇرعىن مينالى-جارىلىس جاراقاتىن الىپ، اۋرۋحاناعا جاتقىزىلعان. ول سنارياد ءتۇسىپ كەتكەن كەزدە جارالانعان.
