شىمكەنت اكىمىنىڭ ورىنباسارىن اتىپ كەتكەننەن كەيىن الەۋمەتتىك جەلىدە قىلمىستىڭ سەبەبىنە قاتىستى ءتۇرلى قاۋەسەت تارادى. الايدا قالا بيلىگى بۇل مالىمەت شىندىققا جاناسپايتىنىن مالىمدەدى، دەپ حابارلايدى “ادىرنا” ۇلتتىق پورتالى.
"بۇقارالىق اقپارات قۇرالدارى مەن الەۋمەتتىك جەلىدە اكىمنىڭ ورىنباسارى رۋسلان بەردەنوۆكە شابۋىل جاساۋعا كۇدىكتىنىڭ ايەلىنە قىرىنداۋى سەبەپ بولدى دەگەن جالعان اقپارات تاراتىپ جاتىر. بۇل مالىمەت شىندىققا جاناسپايتىنىن مالىمدەيمىز", - دەپ حابارلادى شىمكەنت قالالىق پوليتسيا دەپارتامەنتى.
بۇل جاعدايعا قالالىق ىشكى ساياسات جانە جاستار ءىسى باسقارماسىنىڭ باسشىسى ايگەرىم جۇماعۇلوۆا دا تۇسىنىكتەمە بەردى. ونىڭ ايتۋىنشا كۇدىكتىنىڭ ايەلى بەردەنوۆپەن تانىس بولماعان.
"پوليتسيا بولىمشەسىندە ۇستالعان ازاماتتىڭ ايەلىمەن سويلەستىم. ايەل كۋالىك بەرۋگە كەلىپ، بەردەنوۆتى تانىمايتىنىن ايتتى. مۇنداي جاعدايدا قىرىنداۋ تۋرالى نە ايتۋعا بولادى؟ تەرگەۋ قورىتىندىسى جوق، سوت ۇكىمى شىقپادى، سىزدەرگە ايىپ تاعۋعا كىم قۇقىق بەردى؟! مەن بوتەننىڭ ايەلىنە قىرىنداپتى دەپ ايتىپ قانا قويماي، كۇدىكتىنىڭ ارەكەتىن اقتايتىن ادامداردى تۇسىنبەيمىن»، - دەيدى جۇماعۇلوۆا.
ول باق وكىلدەرىن، بلوگەرلەر مەن قۇقىق قورعاۋشىلاردى زاڭدى بۇزباۋعا جانە جالعان اقپارات جاريالاماۋعا شاقىردى.
ەسكە سالا كەتەيىك، بەردەنوۆقا قاستاندىق 21 ءساۋىر كۇنى كەشكە جاسالعان. قالا اكىمىنىڭ ورىنباسارى وق اتىپ جاراقات الىپ، اۋرۋحاناعا جاتقىزىلدى. الدىن الا مالىمەت بويىنشا، وعان وق اتقان شىمكەنت قالاسى اكىمدىگىنىڭ توو قىزمەتكەرى بولىپ شىقتى. قاستاندىق بويىنشا قىلمىستىق ءىس قوزعالىپ، كۇدىكتى قولعا ءتۇستى.
