شىمكەنتتە قالا تۇرعىندارى اراسىندا سالاۋاتتى ءومىر سالتىن ناسيحاتتاپ، بۇقارالىق سپورتتى دامىتۋ جانە ۆەلوسپورتقا دەگەن قىزىعۋشىلىقتى ارتتىرۋ ماقساتىندا «شىمكەنت ۆەلومارافونى» ۇيىمداستىرىلدى.
قالالىق دەنە شىنىقتىرۋ جانە سپورت باسقارماسى مۇرىندىق بولعان شارانىڭ اشىلۋ سالتاناتى «تاۋەلسىزدىك» ساياباعىندا ءوتتى. ودان كەيىن 350-گە جۋىق قاتىسۋشى 20 شاقىرىمدىق قاشىقتىقتى باعىندىرۋ ءۇشىن يپپودرومعا قاراي جولعا شىقتى.
بيىل ەكىنشى جىل قاتارىنان ۇيىمداستىرىلعان ۆەلومارافونعا ءارتۇرلى جاستاعى قالا تۇرعىندارى قاتىستى. جارىستىڭ اشىلۋ سالتاناتىندا قالالىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەرمەك دارمەنوۆ قاتىسۋشىلارعا ساتتىلىك تىلەپ، ۆەلومارافوننىڭ اۋقىمى جىل سايىن كەڭەيىپ كەلە جاتقانىن، قالادا ۆەلوسپورتتى بۇقارالىق دەڭگەيدە دامىتۋعا باسىمدىق بەرىلىپ وتىرعانىن جەتكىزدى.
جارىسقا قاتىسقان جاس ۆەلوشاباندوزداردىڭ ءبىرى – 14 جاستاعى ارمان دياسۇلى. ول «شىمكەنت ۆەلومارافونىنا» بيىل ەكىنشى رەت قاتىسىپ، بۇل جولى دا 20 شاقىرىمدىق قاشىقتىقتى ەڭسەرۋگە نيەتتى ەكەنىن ايتتى.
جارىس قورىتىندىسى بويىنشا ۇزدىك ناتيجە كورسەتكەن قاتىسۋشىلار مەدالدارمەن جانە العىس حاتتارمەن ماراپاتتالدى.
ۇيىمداستىرۋشىلاردىڭ ايتۋىنشا، مۇنداي سپورتتىق شارالار تۇرعىنداردىڭ دەنە بەلسەندىلىگىن ارتتىرىپ قانا قويماي، قالادا بۇقارالىق سپورت مادەنيەتىن قالىپتاستىرۋعا دا ىقپال ەتەدى. اسىرەسە، جاستاردى سپورتقا باۋلۋ، ولاردىڭ بوس ۋاقىتىن ءتيىمدى ۇيىمداستىرۋ جانە سالاۋاتتى ءومىر سالتىن ۇستانۋعا ىنتالاندىرۋ – ۆەلومارافوننىڭ نەگىزگى باعىتتارىنىڭ ءبىرى.
سونىمەن قاتار ۆەلومارافون قالا تۇرعىندارىنا ءوزارا تاجىريبە الماسىپ، سپورتقا دەگەن ورتاق قىزىعۋشىلىق توڭىرەگىندە باس قوسۋعا مۇمكىندىك بەردى. قاتىسۋشىلار بەلگىلەنگەن باعىت بويىنشا قوزعالىپ، وزدەرىنىڭ توزىمدىلىگى مەن فيزيكالىق دايىندىعىن سىنادى. شارا بارىسىندا قاۋىپسىزدىك تالاپتارىن ساقتاۋ مەن جول قوزعالىسى ەرەجەلەرىنە باعىنۋدىڭ ماڭىزدىلىعىنا دا نازار اۋدارىلدى.
ايتا كەتۋ كەرەك، سوڭعى جىلدارى شىمكەنتتە بۇقارالىق سپورتتى دامىتۋعا باعىتتالعان ءتۇرلى جارىستار مەن سپورتتىق باستامالار تۇراقتى تۇردە ۇيىمداستىرىلىپ كەلەدى. وسىنداي شارالار تۇرعىنداردىڭ سپورتپەن جۇيەلى اينالىسۋىنا سەرپىن بەرىپ، بەلسەندى ءارى سالاۋاتتى قوعام قالىپتاستىرۋعا نەگىز بولادى. ۇيىمداستىرۋشىلار الداعى ۋاقىتتا دا ۆەلومارافوننىڭ اۋقىمىن كەڭەيتىپ، قاتىسۋشىلار سانىن ارتتىرۋدى كوزدەيدى.


