پرەزيدەنت قاسىم-جومارت توقاەۆتىڭ شاقىرۋىمەن 26-27 ءساۋىر كۇندەرى يتاليا پرەمەر-ءمينيسترى دجوردجا مەلوني قازاقستانعا رەسمي ساپارمەن كەلەدى. بۇل تۋرالى بۇگىن، 21 ساۋىردە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«كەلىسسوز بارىسىندا تاراپتار قازاقستان مەن يتاليا اراسىنداعى ستراتەگيالىق سەرىكتەستىكتى دامىتۋ پەرسپەكتيۆاسىن تالقىلايدى.
27 ءساۋىر كۇنى استانادا «ورتالىق ازيا – يتاليا» فورماتىنداعى تۇڭعىش سامميت وتەدى»،—دەلىنگەن حابارلامادا.
ەسكە سالايىق، 2023 جىلدىڭ مامىرىندا يتاليا مينيسترلەر كەڭەسىنىڭ توراعاسى دجوردجا مەلوني استاناعا جۇمىس ساپارىمەن كەلۋى كەرەك ەدى. الايدا ول ەميليا-رومانيا ايماعىندا بولعان جويقىن سۋ تاسقىنى سالدارىنان كوپتەگەن ادامنىڭ قازا تابۋىنا بايلانىستى تابيعات اپاتىنان زارداپ شەككەن وڭىرلەرگە بارۋ ءۇشىن حيروسيمادا ءوتىپ جاتقان G7 سامميتىنە سوڭىنا دەيىن قاتىسپاي، ەلىنە قايتقان بولاتىن.
