2025 جىلى پايدالانىلماي جاتقان 2,1 ملن گەكتار جەر مەرزىمىنەن بۇرىن مەملەكەت مەنشىگىنە قايتارىلدى، دەپ حابارلايدى “ادىرنا”.
2025 جىلى جەردى ءتيىمدى پايدالانۋ ماسەلەلەرى جونىندەگى رەسپۋبليكالىق كوميسسيانىڭ قۇقىق قورعاۋ ورگاندارى مەن قوعام وكىلدەرىنىڭ قاتىسۋىمەن 3 وتىرىسى، سونداي-اق 42 وڭىرلىك كەڭەس وتكىزىلدى.
جەر رەسۋرستارىن باسقارۋ كوميتەتىنىڭ مالىمەتىنشە، 2022 جىلدان بەرى مەملەكەت مەنشىگىنە بارلىعى 14,3 ملن گەكتار جەر قايتارىلعان. ونىڭ ىشىندە:
- 2022 جىلى – 5,4 ملن گا،
- 2023 جىلى – 4,6 ملن گا،
- 2024 جىلى – 2,2 ملن گا،
- 2025 جىلى – 2,1 ملن گا.
ۆەدومستۆونىڭ حابارلاۋىنشا، قايتارىلعان جەردىڭ 12,5 ملن گەكتارى – جايىلىمدىق القاپتار. بۇل جەرلەردە 16,1 مىڭ شارۋاشىلىقتا مال مۇلدە بولماعان نەمەسە جايىلىمعا تۇسەتىن جۇكتەمە تومەن بولعان.
2022 جىلدان بەرى مەملەكەتكە قايتارىلعان جەرلەردىڭ 7,7 ملن گەكتارى قايتا بولىنگەن، ونىڭ ىشىندە:
- 2,7 ملن گەكتار مال جايۋ ءۇشىن ورتاق پايدالانۋعا بەرىلدى،
- 5 ملن گەكتار كونكۋرستىق نەگىزدە ۇسىنىلدى.
سونىمەن قاتار، جەر پايدالانۋشىلار 4,6 ملن گەكتار اۋماقتا جەردى قايتا يگەرە باستاعان.
قازىرگى ۋاقىتتا تاعى 7,5 ملن گەكتار جەردى قايتا ءبولۋ جۇمىستارى جالعاسۋدا. اكىمدىكتەرگە ەڭ الدىمەن جەرگىلىكتى تۇرعىنداردىڭ جايىلىمعا دەگەن قاجەتتىلىگىن جانە اۋىل شارۋاشىلىعىمەن اينالىسقىسى كەلەتىن ازاماتتاردىڭ مۇددەسىن ەسكەرۋ تاپسىرىلدى.
