2024 جىلعى World Press Photo حالىقارالىق بايقاۋىندا جىلدىڭ ۇزدىك فوتوسى رەتىندە پالەستينالىق 9 جاسار ماحمۋد ادججۋردىڭ سۋرەتى تاڭدالدى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
ول 2024 جىلدىڭ ناۋرىز ايىندا ءيزرايلدىڭ اۋە شابۋىلى سالدارىنان ەكى قولىنان ايىرىلعان.
بۇل اسەرلى فوتوسۋرەتتى پالەستينالىق فوتوجۋرناليست سامار ابۋ ەلۋف The New York Times ءۇشىن تۇسىرگەن. ول 2023 جىلدىڭ سوڭىندا گازادان ەۆاكۋاتسيالانىپ، قازىرگى ۋاقىتتا كاتار استاناسى دوحادا ماحمۋد تۇرىپ جاتقان تۇرعىن ءۇي كەشەنىندە ءومىر سۇرۋدە. سامار اۋىر جاراقات العان پالەستينالىقتاردىڭ تاعدىرىن سۋرەتتەر ارقىلى بۇكىل الەمگە تانىتىپ ءجۇر.
«بۇل – ءۇنسىز، بىراق قاتتى ايتىلعان فوتوسۋرەت. ول ءبىر عانا بالانىڭ ەمەس، تۇتاس سوعىستىڭ تاريحىن باياندايدى. ونىڭ زاردابى بىرنەشە بۋىنعا دەيىن جالعاسادى»، – دەدى بايقاۋ ديرەكتورى دجۋمان ەل زەين حۋري.
فينالعا وتكەن باسقا فوتوسۋرەتتەر دە بار.
«تۇنگى وتكەل» — دجون مۋردىڭ Getty Images اگەنتتىگىنە تۇسىرگەن سۋرەتى. قىتايلىق ميگرانتتار اقش پەن مەكسيكا شەكاراسىن كەسىپ وتكەن سوڭ سۋىق جاڭبىر استىندا توڭىپ تۇر. بۇل سۋرەت شەكاراداعى ءومىردىڭ قيىندىقتارىن كورسەتەدى.
ال «امازونياداعى قۇرعاقشىلىق» — Musuk Nolte تۇسىرگەن فوتودا جاس جىگىت اناسىنا تاماق اپارىپ بارا جاتىر. بۇرىن بۇل اۋىلعا قايىقپەن جەتۋگە بولاتىن ەدى، ەندى ەكى شاقىرىم قۇرعاپ قالعان وزەن ارناسىمەن جاياۋ جۇرۋگە تۋرا كەلەدى. بۇل فوتوسۋرەت ايماقتاعى ەكولوگيالىق اپات پەن سۋ تاپشىلىعىنىڭ اۋقىمىن كورسەتەدى.
وڭىرلىك سۋرەتتەر قاتارىندا اقش پرەزيدەنتى ترامپقا وق اتىلعان ءسات تە ۇسىنىلعان.
سولتۇستىك جانە ورتالىق امەريكا ايماعى، «جەكە سۋرەت» نوميناتسياسى بويىنشا جەڭىمپاز — «دونالد ترامپقا قاستاندىق» فوتوسى. Washington Post ءۇشىن دجابين بوتسفورد تۇسىرگەن بۇل سۋرەت 2024 جىلعى سايلاۋ ناۋقانى كەزىندەگى ماڭىزدى ءساتتى بەينەلەيدى. قاستاندىقتان كەيىن ساحنادان كەتىپ بارا جاتقان ترامپ: «كۇرەسۋ، كۇرەسۋ، كۇرەسۋ!» دەپ ايقايلاعان. بۇل كادر ساياساتكەردىڭ سيرەك كەزدەسەتىن ءالسىز ءساتىن كورسەتەدى.
ايتا كەتەيىك، 2025 جىلى World Press Photo بايقاۋىنا 141 ەلدەن 3 778 فوتوگراف قاتىسىپ، 59 320 سۋرەت جىبەرىلگەن. جەڭىمپازدار ءۇش نوميناتسيا بويىنشا انىقتالدى. ولار — جەكە فوتوسۋرەتتەر، فوتوسەريالار جانە ۇزاقمەرزىمدى جوبالار.
ۇقساس جاڭالىقتار
