SkyDrive Inc كومپانياسى جاساعان ۇشاتىن اۆتوكولىك دۇنيەجۇزىلىك كورمەنىڭ رەسمي اشىلۋى قارساڭىندا وساكانىڭ جاساندى ارالى – يۋمەشيمادا كوككە كوتەرىلدى. كورمەنىڭ اشىلۋى 13 ساۋىردە ءوتتى، دەپ حابارلايدى “ادىرنا” ۇلتتىق پورتالى جاپوندىق باسىلىمدارعا سىلتەپ.
تىك ۇشىپ-قونا الاتىن ەلەكتر كولىگى (eVTOL) – ءۇش ادام جانە ءبىر ۇشقىشتى تاسىمالداي الاتىن جەڭىل مۋلتيكوپتەر. ونىڭ شۋ دەڭگەيى تىكۇشاقپەن سالىستىرعاندا شامامەن ءۇش ەسە تومەن.
تانىستىرىلىمدىق ۇشۋ بارىسىندا مۋلتيكوپتەر شامامەن بەس مەتر بيىكتىكتە ءتورت مينۋتتاي اۋادا قالىقتاپ تۇردى.
«ءبىزدىڭ ماقساتىمىز – ادامدار بۇل كولىكتى تانىپ-ءبىلىپ، ونى ۇناتسا دەيمىز»، – دەدى SkyDrive كومپانياسىنىڭ باس ديرەكتورى فۋكۋدزاۆا توموحيرو.
كومپانيا جاپونيانىڭ ورتالىعىنداعى ايتي پرەفەكتۋراسىندا، تويوتا قالاسىندا ورنالاسقان.
ۇشاتىن كولىكتەر باستاپقىدا Osaka Expo كورمەسىندە كولىك قۇرالى رەتىندە قولدانىلۋى جوسپارلانعان ەدى. دەگەنمەن، ولار كورمە قوناقتارىن تاسىمالدامايدى، الايدا SkyDrive كورمە كەزىندە ءوزىنىڭ ۇشاتىن اۆتوكولىكتەرىنىڭ كورسەتىلىمدىك ۇشۋلارىن وتكىزەدى.
