SkyDrive Inc kompanııasy jasaǵan ushatyn avtokólik Dúnıejúzilik kórmeniń resmı ashylýy qarsańynda Osakanyń jasandy araly – Iýmeshımada kókke kóterildi. Kórmeniń ashylýy 13 sáýirde ótti, dep habarlaıdy “Adyrna” ulttyq portaly japondyq basylymdarǵa siltep.
Tik ushyp-qona alatyn elektr kóligi (eVTOL) – úsh adam jáne bir ushqyshty tasymaldaı alatyn jeńil mýltıkopter. Onyń shý deńgeıi tikushaqpen salystyrǵanda shamamen úsh ese tómen.
Tanystyrylymdyq ushý barysynda mýltıkopter shamamen bes metr bıiktikte tórt mınýttaı aýada qalyqtap turdy.
«Bizdiń maqsatymyz – adamdar bul kólikti tanyp-bilip, ony unatsa deımiz», – dedi SkyDrive kompanııasynyń bas dırektory Fýkýdzava Tomohıro.
Kompanııa Japonııanyń ortalyǵyndaǵy Aıtı prefektýrasynda, Toıota qalasynda ornalasqan.
Ushatyn kólikter bastapqyda Osaka Expo kórmesinde kólik quraly retinde qoldanylýy josparlanǵan edi. Degenmen, olar kórme qonaqtaryn tasymaldamaıdy, alaıda SkyDrive kórme kezinde óziniń ushatyn avtokólikteriniń kórsetilimdik ushýlaryn ótkizedi.
