قازاقستاندىق بەلگىلى بالۋان ءارى جاتتىقتىرۋشى، ءماجىلىس دەپۋتاتى داۋلەت تۇرلىحانوۆ بىرىككەن كۇرەس الەمى (UWW) بيۋروسىنداعى ورنىنان ايىرىلدى. بۇل شەشىم جۋىردا يوردانيادا وتكەن UWW ASIA پرەزيدەنتى سايلاۋىنان كەيىن قابىلداندى، دەپ حابارلايدى "ادىرنا" ۇلتتىق پورتالى.
2024 جىلعى 24 ناۋرىزدا وتكەن ازيا چەمپيوناتى اياسىندا 38 ۇلتتىق فەدەراتسيانىڭ قاتىسۋىمەن وتكەن داۋىس بەرۋ ناتيجەسىندە UWW ازيا كۇرەس وداعىنىڭ جاڭا پرەزيدەنتى بولىپ يوردانيالىق مۇحاممەد ءال-اۋامالا سايلاندى. ول 34 داۋىس جيناپ، 2028 جىلعا دەيىنگى مەرزىمگە تاعايىندالدى.
تۇرلىحانوۆ بۇل قىزمەتتى 2017 جىلدان بەرى ەكى مەرزىم قاتارىنان اتقارعان بولاتىن.
داۋلەت تۇرلىحانوۆ – كەڭەستىك جانە قازاقستاندىق گرەك-ريم كۇرەسىنىڭ تانىمال بالۋانى، كسرو-نىڭ ەڭبەك سىڭىرگەن سپورت شەبەرى، قازاقستاننىڭ ەڭبەك سىڭىرگەن جاتتىقتىرۋشىسى، قازىرگى ۋاقىتتا – قر پارلامەنتى ءماجىلىسىنىڭ دەپۋتاتى.
تۇرلىحانوۆتىڭ ۇلى نۇراسىل بولات 2023 جىلى الماتىداعى تۇنگى كلۋب ماڭىندا ەرلى-زايىپتى اننا مەن ولەگ چەرنوۆتارعا كۇش كورسەتكەنى ءۇشىن سوتتالعان. العاشىندا ايىپپۇلمەن شەكتەلگەن سوت ۇكىمى كەيىن قايتا قارالىپ، ەكى جىلعا باس بوستاندىعىن شەكتەۋ جازاسىنا اۋىستىرىلدى. الايدا، نۇراسىل سوت تالابىن ورىنداماعانى ءۇشىن 2024 جىلدىڭ قازان ايىندا 1 جىل 5 ايعا كولونياعا جىبەرىلدى.
