ەرتەڭنەن باستاپ ەلىمىزدىڭ 20 وڭىرىندە سەنات دەپۋتاتتىعىنا كانديداتتاردى ۇسىنۋ باستالادى. بۇل تۋرالى قازاقپارات حابارلادى، دەپ جازادى “ادىرنا” ۇلتتىق پورتالى.
قر ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆتىڭ مالىمدەۋىنشە، كانديداتتاردى ۇسىنۋ ەرتەڭ باستالادى.
«كانديداتتاردى ۇسىنۋ سايلاۋ تاعايىندالعان كۇننىڭ ەرتەڭىندە باستالادى. بۇگىن «ەگەمەن قازاقستان» جانە «كازاحستانسكايا پراۆدا» گازەتتەرىندە جارلىقتىڭ ءماتىنى رەسمي تۇردە جاريالاندى. ياعني، بۇگىننەن باستاپ جارلىق كۇشىنە ەنەدى. سوعان وراي كانديداتتاردى ۇسىنۋ ەرتەڭنەن باستالىپ، داۋىس بەرۋگە 1 اي قالعانعا دەيىن ساعات 18-00-دە، ياعني، 14 جەلتوقسان كۇنى جەرگىلىكتى ۋاقىتپەن ساعات 18-00-دە اياقتالادى. سەنات دەپۋتاتتىعىنا كانديداتتاردى تىركەۋ بارلىق قاجەتتى قۇجاتتاردى العان ساتتەن باستالىپ، داۋىس بەرۋگە 20 كۇن قالعاندا جەرگىلىكتى ۋاقىتپەن ساعات 18-00-دە ءتامامدالادى. كانديداتتاردى تىركەۋ بارلىق قۇجاتتار الىنعاننان كەيىن جۇرگىزىلەدى»، - دەدى ول بۇگىن وسك وتىرىسىندا.
ونىڭ اتاپ وتۋىنشە، سەنات دەپۋتاتتىعىنا كانديداتتاردى وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ سايلاۋ كوميسسيالارى قاجەتتى قۇجاتتارى تۇگەل جانە سايلاۋ جارناسى تولەنگەن كەزدە تىركەيدى.
«بۇگىندە سايلاۋ جارناسى 900 مىڭ تەڭگەنى قۇرايدى. بۇل كونستيتۋتسيالىق زاڭدا 15 ەڭ تومەنگى ايلىق مولشەرىندە ايقىندالعان جارناعا ساي كەلەدى. قازىرگى ۋاقىتتا ەڭ تومەنگى ايلىق 60 مىڭ تەڭگەنى قۇرايدى. سايلاۋ الدىنداعى ۇگىت 19 كۇنگە سوزىلادى. ول كانديداتتاردى تىركەۋ اياقتالعان ساتتەن باستالىپ، سايلاۋ قارساڭىنداعى كۇنى جەرگىلىكتى ۋاقىت بويىنشا 00-00-دە اياقتالادى. ياعني، ۇگىت جۇمىستارى 24 جەلتوقسان كۇنى ساعات 18-00-دەن 2023 جىلدىڭ 13 قاڭتار كۇنى ساعات 00-00-گە دەيىن جۇرگىزىلەدى»، - دەدى كونستانتين پەتروۆ.
وسك توراعاسى ورىنباسارىنىڭ دەرەگىنشە، سەنات دەپۋتاتتارىن سايلاۋ تاڭداۋشىلاردىڭ بىرلەسكەن وتىرىسىندا وتەدى جانە ولاردىڭ 50 پايىزدان استام قاتىسقان كەزدە سايلاۋ ءوتتى دەپ سانالادى. ال داۋىس بەرۋگە قاتىسقان تاڭداۋشىلاردىڭ 50 پايىزدان استامىنىڭ قولداۋىنا يە بولعان كانديدات سەنات دەپۋتاتى بولادى.
«جالپى، ناۋقان بۇگىننەن باستاپ، 14 قاڭتارعا دەيىن جالعاسادى. كانديداتتاردى ۇسىنۋ مەرزىمى 16 كۇندى، تىركەۋ مەرزىمى – 26 كۇنگە دەيىنگى ۋاقىتتى قۇرايدى. سايلاۋالدى ۇگىت جۇمىستارى 19 كۇنگە سوزىلادى. تىنىشتىق كۇنى – 13 قاڭتار. داۋىس بەرۋ كۇنى – 14 قاڭتار. وسك 7 كۇننىڭ ىشىندە، ياعني، 20 قاڭتاردان كەشىكتىرمەي سايلاۋ ناتيجەسىن انىقتاپ، بۇقارالىق اقپارات قۇرالدارىندا سايلاۋ قورىتىندىلارى تۋرالى اقپارات جاريالايدى»، - دەدى ول.
“ادىرنا” ۇلتتىق پورتالى
