اباي وبلىسىنىڭ اكىمى بەرىك ءۋالي «تازا قازاقستان» باعدارلاماسىنىڭ جۇزەگە اسىرىلۋىنا ارنالعان جيىندا سەمەي قالاسىنداعى تازالىق جۇمىستارىنىڭ ءتيىستى دەڭگەيدە جۇرگىزىلمەگەنىن سىنعا الدى، دەپ حابارلايدى “ادىرنا” ۇلتتىق پورتالى.
وبلىس باسشىسى سەنبىلىك بارىسىندا جينالعان قوقىستىڭ دەر كەزىندە شىعارىلماعانىن اتاپ ءوتتى.
«مەنىڭ ءبىر اپتا بۇرىن جاريالاعان بەينەۇندەۋىمدى حالىق جاقسى قابىلدادى. باستاماعا قولداۋ ءبىلدىرىپ، سەنبىلىككە شىقتى. الايدا سەمەي قالاسىنداعى سەنبىلىكتە جينالعان قوقىس تولىق شىعارىلماي جاتىر. حالىق الەۋمەتتىك جەلىدە نارازىلىقتارىن بىلدىرۋدە. تۇرعىنداردىڭ ەڭبەگى زايا كەتپەۋى كەرەك. قالا تۇرعىندارى مەن قوناقتارىنا جايلى جاعداي جاساۋ، شاھاردى تازا ۇستاۋ — ءبىزدىڭ مىندەتىمىز»، — دەدى ايماق باسشىسى.
جۋرناليست دياس نۇراقىن ءوزىنىڭ Facebook پاراقشاسىندا پىكىر قالدىردى.
«بەرىك ءۋالي ءبارىن جىرتىپ جاتىر ەكەن. “ەكى اي ۇندەمەدىم، ەندى ايامايمىن” دەپتى. كوشەسىن كۇندە جۋاتىن استانادان كەيىن سۇرقى قاشقان سەمەيدىڭ شاڭ-شاڭ كوشەلەرىنەن ابدەن شوشىسا كەرەك؟ شەنەۋنىكتەردى شەتىنەن شىقپىرتىپ جاتىر. ارقانى كەڭگە سالىپ ۇيرەنگەن اباي وبلىسىنىڭ اتقامىنەرلەرى، اعاشتاردىڭ دا شاشىن تۇزەپ، كۇتۋ كەرەك پە؟ — دەپ اڭ-تاڭ»، — دەپ جازدى.
وبلىس اكىمدىگى تاراپىنان تازالىق جۇمىستارىن جاقسارتۋ جانە تۇرعىنداردىڭ ەڭبەگىن باعالاۋ ماقساتىندا ناقتى شارالار قابىلدانۋى جوسپارلانۋدا.
