جۋرناليست، عالىم ەسەنگۇل كاپقىزى قازاق قوعامىنداعى كەلەڭسىز قۇبىلىستارعا قاتىستى پىكىر ءبىلدىرىپ، الەۋمەتتىك جەلىدە جازبا جاريالادى. اۆتور ءوز جازباسىندا قازاق قوعامىنداعى مورالدىق ۇستانىمنىڭ جوقتىعىن ايتىپ، "قىلمىسكەر" ادامداردىڭ تاسى ورگە دومالايتىنىن ايتادى، دەپ حابارلايدى "ادىرنا" ۇلتتىق پورتالى.
جۋرناليست، بىرقاتار عىلىمي ەڭبەكتەردىڭ اۆتورى ەسەنگۇل كاپقىزى قازاق قوعامىنداعى قالىپتاسقان جاعدايدى سىنعا الدى.
- ءبىزدىڭ قوعامدا قىلمىس ماراپاتتالادى...بىزدە قىلمىس جاساعان ادامنىڭ تاسى ورگە دومالايدى. قىزمەتى وسەدى. ءسويتىپ، قىلمىستى زاڭداستىرامىز. اناۋ-مىناۋ قىلمىستى جاساي بەر، تەك تانىمال بولساڭ بولدى. تانىمالدىلىعىن سەنى قۇتقارادى...
وسىدان بىرنەشە جىل بۇرىن تۇڭعىشباي جامانقۇلوۆ اعامىز جەمقورلىقپەن ءىستى بولعاندا ءبارىمىز ارا تۇردىق، "ول حالىقتىڭ ەركەسى دە، سەركەسى جەسە نە بوپتى؟" دەدىك.سوسىن ەرلان ءبىلال ءوز قىلمىسىن مويىنداسا دا، ونىڭ اتاقتارىنا تيىسپەدىك، قۇداي-اۋ، ءبىراز ۋاقىتتان كەيىن ابايدىڭ ءرولىن سومداپ، بىزگە اقىل ايتقىسى كەلدى.ال ۇبت-دا قىزىنىڭ جالعان قۇجات پايدالانۋىنا جول بەرگەن تۇرسىنبەك قاباتوۆ تا ماراپاتتالىپتى، ەلدىڭ باستى تەلەارنالارىنىڭ ءبىرى "حاباردىڭ" كرەاتيۆتى پروديۋسەرى بولىپتى.ءبىزدىڭ قوعام سونداي. مورالدى جيىپ قويعانبىز، - دەپ جازدى جۋرناليست.
ورايى كەلگەندە ايتا كەتەيىك، تۇرسىنبەك قاباتوۆ – «حابار» اگەنتتىگىنىڭ كرەاتيۆتى پروديۋسەرى بولىپ تاعايىندالدى. بۇل تۋرالى «حابار» اگەنتتىگى اق باسقارما توراعاسى بەرىك ءۋالي الەۋمەتتىك پاراقشاسىندا جازعان ەدى.
"ادىرنا" ۇلتتىق پورتالى
