اباي وبلىسىندا مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىن ناسيحاتتاۋ بويىنشا كەزدەسۋ ءوتتى. وبلىس اكىمى بەرىك ءۋاليدىڭ توراعالىعىمەن وتكەن جيىنعا قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ قاتىستى.
جيىندى اشقان ايماق باسشىسى جولداۋدى ىسكە اسىرۋ بويىنشا اباي وبلىسىندا جۇيەلى جۇمىستاردىڭ قولعا الىنىپ جاتقانىن اتاپ ءوتتى.
«جولداۋداعى باسىم باعىتتاردىڭ ءبىرى – تسيفرلاندىرۋ ساياساتى اياسىندا اباي وبلىسىنىڭ 2026-2030 جىلدارعا ارنالعان تسيفرلىق ترانسفورماتسيا ستراتەگياسى جاساقتالۋدا. ستراتەگيانى ازىرلەۋدەگى نەگىزگى ماقسات – وبلىستى يننوۆاتسيالىق جانە تەحنولوگيالىق تۇرعىدان دامىعان ايماققا اينالدىرۋ. جاساندى ينتەللەكتى ءوڭىردىڭ بارلىق سالالارىنا ەنگىزۋ، ينتەرنەت ينفراقۇرىلىمىن كەڭەيتۋ، Smart City جوبالارىن ەنگىزۋ، مەملەكەتتىك قىزمەتتەردى تولىق ونلاين فورماتقا كوشىرۋ جانە تسيفرلىق ءبىلىم مەن IT-ەكوجۇيەنى دامىتۋدى كوزدەپ وتىرمىز. ءبىزدىڭ ماقسات – ەل پرەزيدەنتىنىڭ تاپسىرمالارىن ءتيىمدى ورىنداپ، حالىقپەن كەرى بايلانىستى كۇشەيتۋ، تسيفرلىق قىزمەتتەردىڭ قولجەتىمدىلىگىن ارتتىرۋ»، - دەدى وبلىس اكىمى.
اباي وبلىسىندا ءتۋريزمدى دامىتۋدىڭ 2025-2027 جىلدارعا ارنالعان جول كارتاسى جوباسى ازىرلەندى. بيىل ابايدىڭ 180 جىلدىعىنا ارنالعان ءىس-شارالار وبلىسقا مىڭداعان تۋريست تارتۋعا مۇمكىندىك بەردى. ال الاكولدە اربات الاڭىن جوندەۋ، جاڭا قوعامدىق كەڭىستىك سالۋ جانە جاعالاۋدى اباتتاندىرۋ ءۇشىن 658 ملن تەڭگە ءبولىندى. 2026 جىلى كول اۋماعىنداعى جۇمىستار تولىق اياقتالىپ، وزگە تۋريستىك باعىتتاردى جۇيەلى دامىتۋ جالعاسادى.
پرەزيدەنت كەڭەسشىسى مالىك وتارباەۆ جولداۋدىڭ نەگىزگى باعىتتارىن ءتۇسىندىرىپ، ەلدىڭ تسيفرلىق ترانسفورماتسياسىن جۇزەگە اسىرۋداعى جاڭا تاسىلدەر مەن باسىمدىقتارعا نازار اۋداردى.
«جولداۋ – مەملەكەتتىك ماڭىزى بار قۇجات. ساياسي ءمانى دە، يدەولوگيالىق ماڭىزى دا زور. پرەزيدەنتىمىز جولداۋدا ەكونوميكامىزعا، ساياساتىمىزعا، تۇتاس مەملەكەتتىك باسقارۋ جۇيەسىنە قاتىستى ساياسي رەفورما رەتىندەگى قۇجاتتى حالىققا ۇسىندى. اسىرەسە الەم قاۋىمداستىعىنىڭ نازارى اۋىپ وتىرعان جاساندى ينتەللەكتىنى ءار سالاعا ەنگىزۋ ناقتى مىندەتتەر جۇكتەدى»، - دەدى ول.
كەزدەسۋدە بورودۋليحا اۋدانىنىڭ اكىمى ايدار يبراەۆ پەن جاڭاسەمەي اۋدانى كوكەنتاۋ اۋىلدىق وكرۋگىنىڭ اكىمى ادىلەت جۇماعالي ءسوز سويلەپ، ءوز وڭىرلەرىندە جولداۋدا جۇكتەلگەن مىندەتتەردى ىسكە اسىرۋ باعىتتارى بويىنشا اتقارىلىپ جاتقان جۇمىستار تۋرالى باياندادى.
