الماتى حالىقارالىق اۋەجايىنا قاتىستى 5 جاستاعى ينساف ەسىمدى قىزدىڭ ولىمىنە بايلانىستى سوتقا تالاپ ارىز بەرىلدى، دەپ حابارلايدى "ادىرنا" ۇلتتىق پورتالى.
مارقۇم ءبۇلدىرشىننىڭ وتباسىن قورعاۋشى ادۆوكات ءدانىلحان شاعاتاەۆتىڭ ايتۋىنشا، نيۋ-دەليدەن Air Astana رەيسىمەن كەلگەن قىز اۋىر حالدە بولعانىنا قاراماستان، اۋەجايدا جالپى ءتارتىپ بويىنشا پاسپورتتىق باقىلاۋدان وتۋگە ءماجبۇر بولعان. سونىمەن قاتار، وعان قاجەتتى ارنايى جەدەل جاردەم كولىگى ەمەس، مۇگەدەكتەرگە ارنالعان اربا ۇسىنىلعان.
قايعىلى وقيعا 2025 جىلدىڭ قاڭتار ايىندا ورىن الدى. ينساف اتا-اناسى جانە رەانيماتولوگ دارىگەرمەن بىرگە ۇشىپ كەلگەن. ۇشۋ بارىسىندا ول وتتەگىمەن، ارنايى مەديتسينالىق جاعدايدا تاسىمالدانعان. الايدا الماتى اۋەجايىنا قونعان سوڭ، ارنايى رەانيموبيل كىرە الماي، وعان رۇقسات بەرىلمەگەن. سول سەبەپتى، قىز امبۋليفت ارقىلى ۇشاقتان تەرمينالعا جەتكىزىلگەن. بۇل قۇرىلعى مۇگەدەك جولاۋشىلارعا ارنالسا دا، اۋىر حالدەگى بالانى تاسىمالداۋعا بەيىمدەلمەگەن.
ادۆوكاتتىڭ ايتۋىنشا، اۋەجايداعى جاعداي ۇشۋعا دەيىنگى دايىندىققا مۇلدەم قايشى بولعان. "بالا ارنايى مەديتسينالىق باقىلاۋ ارقىلى ەمەس، ادەتتەگى جولاۋشىلار سەكىلدى پاسپورتتىق تەكسەرىستەن ءوتتى", – دەدى ول.
ۇشۋدان كەيىن ينساف قوس وكپەسىنەن پنەۆموتوراكس الىپ، جانساقتاۋ بولىمىنە ءتۇستى. وكىنىشكە قاراي، 9 اقپاندا كوز جۇمدى.
تۇركسىب اۋداندىق سوتى بالانىڭ وتباسىنان تۇسكەن تالاپ ارىزدى قابىلداپ، ازاماتتىق ءىستى قاراۋعا دايىنداۋدى باستادى.
Air Astana كومپانياسى ءوز تاراپىنان اۋەجاي قىزمەتتەرىن الدىن الا ەسكەرتكەنى تۋرالى مالىمدەدى. ال اۋەجاي وكىلدەرى مۇگەدەك اربا اكەلىنگەنىن تۇسىندىرمەگەنىمەن، جەدەل جاردەم كولىگىن شاقىرۋدى ۇسىنعاندارىن، بىراق اتا-اناسى بۇل ۇسىنىستان باس تارتقانىن العا تارتتى.
