الماتى پوليتسەيلەرى ادام ۇرلاعان ءۇش جىگىتتى ۇستادى. ولار ەر ادامدى كولىك باگاجىنا سالىپ، كۇشتەپ الىپ بارا جاتقان جەرىنەن ۇستالدى. ۇرلاعاندار جايلى اقپارات Polisia.kz مەديا-پورتالىندا جاريالاندى، دەر حابارلايدى “ادىرنا” ۇلتتىق پورتالى.
دەرەككە سۇيەنسەك، قىلمىس المالى اۋدانىندا بولعان. كەزەكشى ءبولىم تەلەفونىنا Chevrolet ماركالى كولىگىنە ادامدى كۇشتەپ وتىرعىزۋ تۋرالى حابارلاما تۇسەدى. دەرەۋ قالا بويىنشا “ۇستاۋ” جوسپارى ەنگىزىلىپ، كولىكتى ەكى ەكيپاج ماقاتاەۆ پەن جەتىسۋ كوشەلەرىنىڭ قيىلىسىندا توقتاتادى.
“سالونداعى ءۇش ادام ۇستالدى. جۇكسالعىشتان تاعى ءبىر ەر ادام تابىلدى. ول اتالعان كولىكتىڭ يەسى ەكەنى بەلگىلى بولدى. كۇدىكتىلەر جەدەل-تەرگەۋ توبىنا تاپسىرىلدى، - دەلىنگەن پوليتسيا اقپاراتىندا.
كەيىننەن كولىك يەسى جاعدايدىڭ قالاي بولعانىن ءتۇسىندىردى. سوزىنشە الگى جىگىتتەر ونى كۇشتەپ كولىك باگاجىنا باسقان. ارتىنشا تاۋعا اپارىپ، ولتىرەتىنىن ايتىپتى. ال كۇدىكتىلەر بولسا جابىرلەنۋشىنىڭ ءىرى كولەمدە اقشاعا الداپ كەتكەنىن جانە سول ءۇشىن وسى قادامعا بارعاندارىن ايتىپ اقتالۋدا.
قازىرگى تاڭدا اتالعان ىسكە بايلانىستى تەرگەۋ جۇمىستارى باستالدى.
