الەمگە ايگىلى اكتەر دجەكي چان الماتىعا كەلگەنىن راستاپ، قازاقستاندىق سەرىكتەستەرىمەن فوتو جاريالادى. بۇل تۋرالى ونەر يەسى Facebook پاراقشاسىنا جازدى، دەپ حابارلايدى "ادىرنا".
"الماتىعا لوكاتسيالاردى زەرتتەۋ ءۇشىن باردىم. Salem Entertainment ۇجىمىنا اسقان قوناقجايلىلىق ءۇشىن العىس ايتامىن", - دەگەن جازبا قالدىردى اكتەر.
قازاقستاندىق مەدياكومپانيا Instagram-داعى پاراقشاسىندا ايگىلى دجەكي چانمەن جۇمىس كەزدەسۋ وتكەنىن حابارلادى.
"Salem Entertainment قابىرعاسىندا الەمدىك كينەماتوگرافيا اڭىزى – اكتەر، ستسەناريست، رەجيسسەر جانە پروديۋسەر دجەكي چانمەن جۇمىس كەزدەسۋى ءوتتى. ءبىز ءىرى بىرلەسكەن جوبانى جۇزەگە اسىرۋعا كىرىستىك. الماتىدا بولعان ۋاقىتىندا اكتەر ءبىزدىڭ كوماندامىزبەن بىرگە الداعى كارتينانىڭ ءتۇسىرىلىم الاڭدارىن تاڭدادى. ءفيلمنىڭ نەگىزگى بولىگى قازاقستاندا تۇسىرىلەتىن بولادى", - دەپ جازدى كومپانيا وكىلدەرى.
جوبانىڭ باسقا مالىمەتتەرى ازىرگە قۇپيا بولىپ وتىر. الايدا كومپانيا وكىلدەرى كورەرمەندەردى الدا عالامات جاڭالىقتار كۇتۋدە ەكەنىن جەتكىزدى.
بۇدان الدىن الەۋجەلىدە گولليۆۋد جۇلدىزى دجەكي چان الماتىعا ۇشىپ كەلگەنى تۋرالى اقپارات تاراعانىمەن، باستاپقىدا ەشكىم راستاماعان. بىرقاتار سپورت بلوگەرلەرىنىڭ دەرەگىنشە، دجەكي چان 30 قىركۇيەكتە وتەتىن چەمپيوندار ليگاسى اياسىنداعى «قايرات» پەن مادريدتىك «رەال» اراسىنداعى ماتچقا ارنايى قوناق رەتىندە قاتىسۋى مۇمكىن. سونداي-اق ستاديوندا فوتوسەسسيا ۇيىمداستىرىلاتىنى ايتىلۋدا.
