الماتىلىق بويجەتكەندى كەزدەسۋگە شاقىرعان ازامات وعان جاۋىزدىق كورسەتىپ، ولتىرگەن. تۋىستارىنىڭ ايتۋىنشا، كۇدىكتى قىلمىسىن جاسىرۋ ءۇشىن قىزدىڭ ۇيالى تەلەفونىن الىپ قاشىپ كەتكەن، دەپ حابارلايدى «ادىرنا» ۇلتتىق پورتالى استانا تەلەارناسىنا سىلتەمە جاساپ.
اقپاراتقا سايكەس، 31 جاستاعى ايناگۇل الماتى قالاسىندا مانساپ قۇرىپ، جاقىندارىنا جاردەمدەسىپ جۇرگەن ءبىر ءۇيدىڭ كەنجە قىزى بولعان. كەزدەسۋگە شاقىرعان جىگىتتى بۇرىن 1 رەت عانا كورگەن. تۋىستارى ايناگۇلدىڭ كەزدەسۋ الدىندا قالدىرعان اۋديو جازباسىن ءبولىستى. وندا ول 1 ساعات وتىرىپ، ۇيگە قايتامىن دەپ حابارلاما قالدىرعان. الايدا بۇل جاس قىزدىڭ سوڭعى حاتى بولدى.
كافەدە ەر ازامات دورەكىلىك تانىتىپ، بويجەتكەننىڭ ەركىنەن تىس ارەكەتتەرگە بارعان كورىنەدى. ارتىنشا جاس قىزدى كۇشپەن سۇيرەلەپ دالاعا الىپ شىققانىن بىرنەشە كۋاگەر كورگەن. ايناگۇل ءوز تەلەفونىنان پوليتسيا شاقىرعان. الايدا شامامەن 20 مينۋتتان سوڭ كەلگەن ءتارتىپ ساقشىلارى بويجەتكەننىڭ ءمايىتىن تاپتى.
«كامەرادان كورسەتىپ تۇر، كەۋدەسىنەن يتەرگەن ءسىڭىلىمدى. ءسىڭىلىم قۇلاعان، سودان بۇل جىگىت قاشىپ كەتەدى. قاشىپ كەتەدى دە ءبىر 20 مينۋتتان كەيىن با قايتىپ كەلەدى دە، تەلەفونىن تاستاپ كەتەدى. جاڭاعى تەلەفونىن الىپ كەتكەن عوي، ءبىز ويلايمىز نەگە ول تەلەفوندى الىپ كەتتى. ءوزىنىڭ انا دوكازاتەلستۆوسىن ءوشىرۋ ءۇشىن الىپ كەتتى ما دەيمىز. ايتپەسە كەلىپ سكورىي شاقىرۋعا بولار ەدى. وقيعادان كەيىن كۇدىكتىنىڭ جاقىندارى مارقۇمنىڭ اتا-اناسىنىڭ ۇيىنە بارىپ كەشىرىم سۇراماق بولعان. كەشىرىم سۇراۋدىڭ ورنىنا كەۋدەسىن كەرىپ "مى سيۋدا پريشلي نە وپراۆدىۆاتسيا" دەپ تۇر. جانازاسىن شىعارىپ بىتكەننەن كەيىن كەشكىسىن كەلدى، ءبىر كونۆەرت اقشا الىپ كەلدى، ول اقشا بىزگە كەرەك ەمەس، قانعا مالىنعان اقشا ءبىزدىڭ ءسىڭىلىمىزدى قايتارىپ الىپ كەلمەيدى. سول ءۇشىن سىزدەرگە ءبىر ءوتىنىش جىگىت ءوز جازاسىن السىن، قولىمەن ىستەگەنىن موينىمەن كوتەرسىن»، - دەيدى مارقۇمنىڭ اپكەسى.
بۇل جاعداي پوليتسيا دەپارتامەنتىندە تىركەلىپ، تەرگەۋ ارەكەتتەرى ءجۇرىپ جاتىر.
«اتالعان دەرەك بويىنشا تۇركسىب اۋداندىق پوليتسيا باسقارماسىمەن قر قك-ءنىڭ 99-بابى 1-بولىگى بويىنشا سوتقا دەيىنگى تەرگەۋ امالدارى جۇرگىزىلىپ جاتقانىن حابارلايدى»، - دەدى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.
ايتالىق، وسى قىلمىستى جاسادى دەگەن كۇدىكتى 1991 جىلى تۋعان ت. ەسىمدى ازامات ۇستالىپ، قاماۋعا الىندى. قىلمىستىق ءىستىڭ شەڭبەرىندە تەرگەۋ ارەكەتتەرى تەرگەۋدىڭ وبەكتيۆتىلىگى، جان-جاقتىلىعى جانە تولىقتىعى قاعيداتتارىن قاتاڭ ساقتاي وتىرىپ جۇزەگە اسىرىلادى. ساراپتامالار تاعايىندالدى.
مارقۇم ايناگۇلدى جاقىندارى وتە ەڭبەكقور، ادال جان، بىلىكتى مامان، وتباسىنىڭ سۇيىكتى قىزى ەدى دەيدى. قايعىدان قان جۇتقان ونىڭ تۋىستارى كۇدىكتىنىڭ قاتاڭ جازالانۋىن سۇرايدى.
«ادىرنا» ۇلتتىق پورتالى
