الماتىدا ءتورت ادام 8 قاپ اقبوكەن ءمۇيىزىن ساتپاق بولعان. كۇدىكتىلەر الماتى قالاسى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرىمەن جۇرگىزىلگەن ارنايى ءىس-شارانىڭ ناتيجەسىندە انىقتالدى، دەپ حابارلايدى “ادىرنا” ۇلتتىق پورتالى.
«ارنايى ءىس-شارانىڭ نەگىزگى كەزەڭىن الماتى وبلىسىنىڭ اۋماعىندا جەدەل قىزمەتكەرلەر مەن ارنايى جاساق جۇرگىزدى. ول جەردە «حيۋنداي» اۆتوكولىگى توقتاتىلدى، ونىڭ ءىشىن ءتىنتۋ بارىسىندا 1 مىڭ 212 دانا كولەمىندەگى 8 قاپ ءمۇيىز تابىلدى جانە تاركىلەندى. كۇدىكتىلەر پد-ءنىڭ ۋاقىتشا ۇستاۋ يزولياتورىنا قامالدى. سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق تىيىم سالىنعان وسىمدىكتەر مەن جانۋارلار تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ دەرەگى بويىنشا سوتقا دەيىنگى تەرگەۋ باستالدى»، - دەدى، الماتى قالالىق پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى قۋاتبەك ناۋاتوۆ. قر قك-ءنىڭ 201 بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى.ۇقساس جاڭالىقتار
