Májiliste kúzet qyzmetiniń sapasy qyzý talqylandy. Depýtattar mektepterdegi qaýipsizdiktiń álsizdigin, kúzetshilerdiń jasy men biliktiligine qatysty máseleni kóterdi, dep habarlaıdy “Adyrna” ulttyq portaly.
Halyq qalaýlylarynyń aıtýynsha, keıbir bilim ordalarynda egde jastaǵy adamdar kúzetshilik qyzmet atqarady, al olar tótenshe jaǵdaıda qaýipke qarsy tura almaıdy.
“Kúzette 60-70 jastaǵy kisiler otyr. Olardyń ózine kúzetshi kerek qoı”, - dedi QR Parlamenti Májilisiniń depýtaty Rınat Zaıytov.
Ishki ister mınıstrligi ókilderiniń málimdeýinshe, kúzetshilerdiń jasyna qatysty naqty shekteý joq. Mektep dırektorlary kúzetshi tańdaý kezinde óz talaptaryn qoıýǵa quqyly.
“Ár mektep dırektorynyń kúzetshini tańdaý kezinde belgili bir talap qoıýyna tolyq quqyǵy bar”, - dedi QR Ishki ister mınıstriniń orynbasary Igor Lepeha.
Buǵan deıin BAQ ókilderi mektepterdegi kúzet sapasyn arnaıy zerttep, baqylaýdyń álsiz ekenin kórsetken bolatyn. Keıbir oqý oryndarynda týrnıket ornatylǵanymen, bóten adamnyń emin-erkin kirip-shyǵýyna eshqandaı kedergi bolmaǵan.
Qazir elde 4300 kúzet uıymy jumys isteıdi. Onyń 1600-ine qarý qoldanýǵa ruqsat berilgen. Alaıda, lıenzııasynan aıyrylǵan 1186 kompanııanyń birde-biri qarýyn memleketke ótkizbegen. Bul qaýipsizdikke tónetin úlken qater.
QR Parlamenti Májilisiniń depýtaty Jarqynbek Amantaıuly da taqyrypqa qatysty óz oıyn bildirdi.
“Qoldanystaǵy zańda mundaı qarýlardy memleketke ótkizý qarastyrylmaǵan. Jańa zań qabyldansa, bul másele sheshiledi”, - dedi ol.
Depýtattar buǵan deıin kúzetshilerdiń ózderi qylmysqa baryp, adam ólimine sebepker bolǵanyn da eske saldy. Bul ásirese, túngi klýbtar men qoǵamdyq oryndarda jıi kezdesedi.
Qaýipsizdik máselesi mekteptermen ǵana shektelmeıdi. Aýrýhana, teatr, meshit sııaqty adamdar kóp jınalatyn oryndar da terrorıster úshin qolaıly nysan sanalady. Sondyqtan depýtattar kúzet qyzmetkerlerine ortaq talap bekitýdi usynyp otyr.
