كارانتيننىڭ زيانى قاراپايىم حالىققا عانا ەمەس، پارلامەنت دەپۋتاتتارىنا دا كەسىرىن تيگىزىپ وتىر. ەڭبەك دەمالىسىندا جۇرگەن ولار قانشا قالاسا دا قازىر توي-تومالاققا بارا الماي، دەمالىستارىن وتباسىنىڭ جانىندا وتكىزىپ جۇرگەندەرىن ايتتى، دەپ حابارلايدى “ادىرنا” ۇلتتىق پورتالى 31 ارناعا سىلتەمە جاساپ.
دەپۋتات بەرىك ابدىعاليدىڭ دەمالىسى قازاق تاريحىن زەرتتەۋمەن ءوتىپ جاتقان كورىنەدى. ءۇش بولمەلى قىزمەتتىك پاتەرىندە ءۇش ۇلى، جۇبايى بەسەۋى تۇرادى. قولى قالت ەتسە ۇلدارىنىڭ سپورتىنا كوڭىل بولەدى، اۋلادا سەرۋەندەيدى. ءتىپتى ارنايى دەمالۋ ءۇشىن كۋرورت نەمەسە ساناتوريگە دە بارماپتى.
“مەن دە اندا-ساندا جاتتىعامىن. 5-6 ساعات جۇمىس ىستەيمىن. قالعان ۋاقىت ەندى بالالارمەن دالاعا شىعامىز سەرۋەندەپ، وتباسىمىزبەن. مۇمكىنشىلىك بولسا تابيعاتقا شىعامىز. اۋىلعا باردىم وتباسىممەن. ۇلىتاۋدا، تورعايدا بولدىم”،- دەيدى دەپۋتات.
بەرىك ابدىعاليدىڭ پاتەرىندە اسا قىمبات جيھاز بەن مۇلىك جوق.
پاتەرىنىڭ جاتاقحاناعا ۇقسايتىنىن ايتقان دەپۋتات ەرلان سايروۆ كوبىنە ۇيدە وتىرمايدى. جاقىندا وتباسىمەن چەرنوگورياعا بارىپ، دەمالىپ كەلگەن.
“كارانتيننىڭ كەسىرىنەن ەشقانداي توي-تومالاق پەن قوناققا بارا الماي، ۇيدە وتىرىپ قالدىق. ەلگە قايتقىڭ كەلەدى. جاقسى بولسا دا 2-3 كۇننەن كەيىن اۋىلعا قايتقىڭ كەلەدى عوي. ۇيدەمىز. كىتاپ وقيمىز. ودان كەيىن كەشكە جاقىن ءجۇرۋ كەمىندە 7-10 كيلومەتر. ودان كەيىن سول كۇزگى جۇمىسقا دايىندىق قوي قازىر”،- دەيدى ول.
ال، اتىمدا جالعىز ەسكى "ۋازيگىم" بار دەگەن اقجولدىق دەپۋتات بەرىك دۇيسەنبينوۆتىڭ دەمالىسى قوياندىدا، جىلقى باعۋمەن ءوتىپ جاتىر.
اقتوبەدە ءجۇرمىن دەگەن ءدانيا ەسپاەۆا دەمالىسىن نەمەرە باعۋعا ارناپتى. نۇر وتاندىق بەكبولات تىلەۋحاننىڭ سپورتقا كوڭىل ءبولىپ جۇرگەنىن الەۋمەتتىك جەلىلەردەن كورۋگە بولادى. سونداي-اق، پارلامەنتكە بيىل دەپۋتات بولىپ سايلانعان جاناربەك ءاشىمجان دا باسسەينگە، ساناتوريگە بارعانىن الەۋمەتتىك جەلىدە اشىق جاريالاپ ءجۇر.
