دەپۋتات ايدوس سارىم ەاەو-عا مۇشە ەلدەر اراسىندا قازاقستاندىقتاردىڭ جالاقىسى باياۋ وسەتىنىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ماجىلىستە ساياساتتانۋشى، دەپۋتات ايدوس سارىمعا ەاەو مۇشە ەلدەر اراسىندا ناقتى جالاقى كوتەرىلگەنىمەن، قازاقستانداعى ءوسىم سيمۆوليكالىق دەڭگەيدە قالعانىنا قاتىستى ويىن ءبىلىپ، سەبەبىن سۇرادىق.
ء"جىو بويىنشا قازاقستان العاشقى ورىندارعا شىعىپ جاتىر. ماسەلە، شىنىن ايتۋ كەرەك، قازاقستان ەاەو قۇرىلعان كەزدە مۇشە بولىپ، تاۋار وندىرۋشىلەرىنىڭ، قازاقستان بيزنەسمەندەرىنىڭ مۇمكىندىكتەرىن ارتتىراتىن كەزدە شورقاقتىق تانىتتى. مەنىڭ ەسىمدە بار، 2014-2015 جىلى كەلىسسوزدەر ءجۇرىپ جاتقان كەزدە كىشكەنتاي بەلارۋستىڭ ءوزى كەلىسسوزگە 100-150 ادام بولىپ كەلەتىن. قولىندا قاي مامان بار، سونىڭ ءبارىن دەلەگاتسياعا رەسمي قوسىپ باراتىن. ەسەسىنە، ءبىزدىڭ تاراپ 10-15 ادام بولىپ بارىپ، كەلىسسوزدەن ۇتىلاتىن. قازىر ءبىزدىڭ ازاماتتار ۇيرەندى. بىزدە مىقتى ماماندار بار. بىزدە جىبەرىلگەن قاتەلىكتەردى جوندەۋ تۇرعىسىندا جۇمىستار جاسالىپ جاتىر", - دەپ جاۋاپ بەردى دەپۋتات.
سونداي-اق، دەپۋتات وسى تۇستا ەلدەگى سۋبسيديا كولەمىنە دە نازار اۋداردى.
"مەنىڭ بىلەتىنىم، بەلارۋستەگى اۋىل شارۋاشىلىعىنا بولىنەتىن سۋبسيديا كولەمى بىزدىكىنەن الدەقايدا جوعارى. سول سەبەپتى ءبىزدىڭ سورەلەرىمىزدە بەلارۋستىڭ تاۋارى، ءسۇتى، شۇجىعى تۇر. ەسەسىنە، ول جاقتا قازاقستاننىڭ ءسۇتى، شۇجىعى تۇرعان جوق. جاقسى زاڭدار كەرەك. كەشەندى ەڭبەك ەتەتىن، ءار كۇن سايىن داۋلاسىپ، ەكى جىل، ون جىل داۋلاسىپ بولسا دا، ناتيجەگە جەتەتىن ءىس-قيمىلدار قاجەت", - دەدى ول.
