ءماجىلىس دەپۋتاتى جاناربەك ءاشىمجانوۆ قر پرەمەر-ءمينيسترىنىڭ ورىنباسارى ە.ب. كوشەرباەۆقا جولداعان دەپۋتاتتىق ساۋالىندا ۇلتتىق قۇندىلىقتاردى مانسۇقتاپ، وتباسى ينستيتۋتىن السىرەتۋدى كوزدەيتىن اعىمدار مەن ۇيىمداردىڭ ارەكەتىنە الاڭداۋشىلىق ءبىلدىردى.
دەپۋتاتتىڭ ايتۋىنشا، قازىرگى تاڭدا الەۋمەتتىك جەلىلەردە، اسىرەسە TikTok جانە باسقا دا پلاتفورمالاردا جاستار اراسىندا ۇلتتىق داستۇرلەرگە جات مازمۇن كەڭىنەن ناسيحاتتالۋدا. مۇنداي ۇگىت-ناسيحاتتىڭ ارتىندا حالىقارالىق ۇيىمدار تۇرعانىن جانە ولاردىڭ ەلىمىزدىڭ ىشكى ساياساتىنا ىقپال ەتۋگە تىرىساتىنىن اتاپ ءوتتى.
ءاشىمجانوۆ شەتەلدەن قارجىلاندىرىلاتىن ۇكىمەتتىك ەمەس ۇيىمداردىڭ كەيبىرى جاستاردى ازعىندىققا يتەرمەلەۋگە باعىتتالعانىن ايتىپ، "فەمينيتا" ۇيىمىنىڭ مەكتەپ وقۋشىلارىنا جىنىستىق قاتىناسقا بايلانىستى شاقىرتۋلار تاراتقانىن مىسالعا كەلتىردى. ونىڭ ايتۋىنشا، بۇل ارەكەتتەر بۇۇ-نىڭ بالالار قۇقىعى جونىندەگى كونۆەنتسياسىنا دا قايشى كەلەدى.
دەپۋتات قاسىم-جومارت توقاەۆتىڭ بۋرابايدا وتكەن ۇلتتىق قۇرىلتايداعى ءسوزىن ەسكە سالىپ، وندا مەملەكەت باسشىسى "دەموكراتيالىق مورالدىق قۇندىلىقتار" جەلەۋىمەن كوپتەگەن ەلدەرگە لگبت-نى تاڭۋ ءۇردىسى ءجۇرىپ جاتقانىن اشىق ايتقانىن اتاپ ءوتتى. پرەزيدەنت سونداي-اق، اقش-تىڭ بۇرىنعى پرەزيدەنتى دونالد ترامپ باستاعان ءداستۇرلى مورالدىق قۇندىلىقتاردى قالپىنا كەلتىرۋ جونىندەگى باستامالاردى قولداۋعا لايىق دەپ باعالاعانىن دا تىلگە تيەك ەتتى.
دەپۋتات ۇلتتىق قۇندىلىقتاردى قورعاۋ ماقساتىندا ۇكىمەتكە كەلەسى شارالاردى قولعا الۋدى ۇسىندى:
- الەۋمەتتىك جەلىلەردى قاتاڭ سۇزگىدەن وتكىزۋ، اسىرەسە، كامەلەتكە تولماعاندارعا زياندى اقپارات تاراتۋعا تىيىم سالۋ.
- مادەنيەت جانە اقپارات مينيسترلىگىنىڭ لگبت قوزعالىسىنىڭ جاسوسپىرىمدەرگە اسەرى تۋرالى زەرتتەۋىن اياقتاپ، قوعامعا جاريالاۋ.
- ءداستۇرلى مورالدىق قۇندىلىقتاردى نىعايتۋ جونىندە ارنايى تۇجىرىمداما ازىرلەۋ.
- شەتەلدەن قارجىلاندىرىلاتىن ۇكىمەتتىك ەمەس ۇيىمداردى تەكسەرىپ، ولاردىڭ جاسوسپىرىمدەرمەن جۇمىس ىستەۋىنە توسقاۋىل قويۋ.
ءاشىمجانوۆتىڭ ايتۋىنشا، وتكەن جىلى لگبت-نى ناسيحاتتاۋعا قارسى باستاماشىل توپ جاريالاعان پەتيتسياعا ەكى اپتانىڭ ىشىندە 50 مىڭنان استام ادام قول قويعان. بۇل – قوعامنىڭ ۇلتتىق قۇندىلىقتاردى قورعاۋعا دەگەن زور ىنتاسىنىڭ كورىنىسى.
"ۇرپاعىمىزدى ازدىراتىن، ءداستۇرىمىزدى توزدىراتىن، الاۋىزدىقتى قوزدىراتىن، رۋحىمىزدى سىندىراتىن "دەموكراتيالىق ۇردىستەردىڭ" اتاسىنا نالەت! بۇگىندە كوپتەگەن مەملەكەتتەر ۇلتتىق بولمىستارىن قورعاۋ ءۇشىن شەكتەۋ شارالارىن قابىلداۋدا. ال ءبىز ءوز بولاشاعىمىزدى قورعاۋ ءۇشىن ناقتى شەشىمدەر قابىلداۋىمىز قاجەت،" – دەدى جاناربەك ءاشىمجانوۆ.
