اباي وبلىسىنىڭ بەسقاراعاي اۋدانىندا شىققان دالا ءورتى “سەمەي ورمانى” مەملەكەتتىك ورمان تابيعي رەزەرۆاتىنا تارادى، دەپ حابارلايدى “ادىرنا” ۇلتتىق پورتالى.
توتەنشە جاعدايلار مينيسترلىگىنىڭ مالىمەتىنشە، ەرنازار اۋىلدىق وكرۋگىنىڭ قويانباي اۋىلىندا قۇرعاق ءشوپ تۇتانىپ، قاتتى جەلدىڭ اسەرىنەن جالىن جىلدام تاراپ كەتكەن. جەل ەكپىنى سەكۋندىنا 26 مەترگە دەيىن جەتكەن.
“دالا ءورتى ءىشىنارا ‘سەمەي ورمانى’ موتر موروزوۆ فيليالىنىڭ ورمان القابىنا ءوتتى”، – دەلىنگەن مينيسترلىكتىڭ رەسمي حابارلاماسىندا.
وقيعا ورنىنا ارنايى جەدەل شتاب قۇرىلىپ، ونى توتەنشە جاعدايلار ۆيتسە-ءمينيسترى باتىربەك ابدىشەۆ باسقارىپ وتىر.
ءورتتى سوندىرۋگە اباي جانە پاۆلودار وبلىستارىنىڭ تجد قىزمەتكەرلەرى، “سەمەي ورمانى” مەن “ەرتىس ورمانى” ورمان شارۋاشىلىقتارىنىڭ ماماندارى جانە جەرگىلىكتى اتقارۋشى ورگانداردىڭ وكىلدەرى تارتىلعان. جالپى 240 ادام مەن 96 تەحنيكا جۇمىلدىرىلعان. سونىمەن قاتار، اۋەدەن بارلاۋ جۇمىستارى جۇرگىزىلۋدە.
ايتا كەتەيىك، بۇعان دەيىن پاۆلودار وبلىسىنىڭ باياناۋىل اۋدانىنداعى جاسىباي ورمان شارۋاشىلىعىندا دا ءورت شىققانى حابارلانعان بولاتىن.
