اقپاراتتىق تەحنولوگيالاردىڭ قارقىندى دامۋى ادامدارعا شەكسىز مۇمكىندىكتەر ۇسىنىپ قانا قويماي، جاڭا قاۋىپ-قاتەرلەردى دە الىپ كەلدى. بۇگىندە جالعان اقپارات، قارجى پيراميدالارى، ينتەرنەت-الاياقتىق، لۋدومانيا سياقتى ماسەلەلەر كوپتەگەن ادامداردىڭ ومىرىنە ەلەۋلى اسەر ەتۋدە. بۇل ماقالادا ءبىز وسى قاۋىپتەردىڭ ءمانىن اشىپ، ولارعا قارسى تۇرۋدىڭ ءتيىمدى جولدارىن قاراستىرامىز.
جالعان اقپارات (فەيك) – قوعامدا سەنىمدى اقپارات سەكىلدى تارالاتىن، بىراق شىندىققا جاناسپايتىن مالىمەتتەر. مۇنداي اقپاراتتار الەۋمەتتىك جەلىلەردە، جاڭالىق سايتتارىندا، مەسسەندجەرلەردە ءجيى تارالادى.
قوعامدىق پىكىرگە اسەر ەتەدى – ادامدار جالعان اقپاراتقا سەنىپ، قاتە شەشىمدەر قابىلدايدى. ارانداتۋشىلىق تۋعىزادى – جالعان مالىمەتتەر ارقىلى حالىقتى دۇرلىكتىرۋ، الاۋىزدىق تۋعىزۋ مۇمكىن. جەكە تۇلعالارعا زيان كەلتىرەدى – جالعان اقپارات كەيدە بەلگىلى ءبىر ادامداردىڭ بەدەلىنە نۇقسان كەلتىرۋ ماقساتىندا تاراتىلادى.
جالعان اقپاراتتان قالاي قورعانۋعا بولادى؟
اقپاراتتىڭ دەرەككوزىن تەكسەرىڭىز – رەسمي اقپارات كوزدەرىن قولدانىڭىز. فاكتچەكينگ جاساڭىز – كۇماندى اقپاراتتى باسقا بەدەلدى باق-تاعى جاڭالىقتارمەن سالىستىرىڭىز. ەموتسياعا بەرىلمەڭىز – جالعان اقپارات كوبىنەسە ۇرەي، قورقىنىش تۋعىزۋعا باعىتتالادى.
قارجى پيراميدالارى – ادامداردى وڭاي تابىس تابۋعا يتەرمەلەيتىن الاياقتىق جۇيە. مۇندا جاڭا قاتىسۋشىلاردىڭ سالىمى ەسەبىنەن بۇرىنعى قاتىسۋشىلارعا تولەم جاسالادى. ءبىر ساتتە جاڭا ادامداردىڭ سانى ازايعان كەزدە جۇيە قۇلايدى، ال سوڭىندا كوپشىلىگى قارجىسىنان ايىرىلىپ قالادى.
قارجى پيراميدالارىنىڭ بەلگىلەرى قانداي؟
تەز بايىتۋدى ۋادە ەتۋ – قىسقا مەرزىمدە كوپ اقشا تابۋ مۇمكىندىگى ۇسىنىلادى. ناقتى ءونىمنىڭ جوقتىعى – كومپانيادا ناقتى تاۋار نەمەسە قىزمەت بولمايدى. جاڭا قاتىسۋشىلاردى تارتۋعا مىندەتتەۋ – جۇيە جاڭا ادامداردىڭ سالىمىنا تاۋەلدى بولادى.
ينتەرنەت-الاياقتىقتىڭ تۇرلەرى كوپ. اتاپ ايتار بولساق، فيشينگ (قۇپيا اقپاراتتى ۇرلاۋ) – الاياقتار جالعان سايتتار ارقىلى بانك كارتالارىنىڭ دەرەكتەرىن الادى. الدامشى ينتەرنەت-دۇكەندەر – تۇتىنۋشىلاردان الدىن الا تولەم الىپ، تاۋار جىبەرمەيدى. جالعان ينۆەستيتسيالىق جوبالار – كريپتوۆاليۋتا نەمەسە اكتسيالارعا ينۆەستيتسيا سالۋدى ۇسىنىپ، ادامداردىڭ اقشاسىن جىمقىرۋ.
الاياقتىقتان قالاي قورعانا الامىز؟
تەكسەرىلگەن پلاتفورمالاردى قولدانىڭىز – ونلاين تولەم جاساماس بۇرىن سايتتىڭ بەدەلىن تەكسەرىڭىز.
قۇپيا دەرەكتەردى بولىسپەڭىز – بانك كارتاسىنىڭ دەرەكتەرىن بوتەن ادامدارعا ايتپاڭىز.
جوعارى تابىسقا ۋادە بەرەتىن جوبالارعا سەنبەڭىز – اسىرەسە، كەپىلدەندىرىلگەن ۇلكەن پايدا تۋرالى ۇسىنىستاردان ساق بولىڭىز.
لۋدومانيا – قۇمار ويىندارعا دەگەن تاۋەلدىلىك، بۇل ادامنىڭ پسيحولوگيالىق جانە قارجىلىق جاعدايىنا تەرىس اسەر ەتەدى. بۇگىندە ونلاين-كازينو، بۋكمەكەرلىك كەڭسەلەردىڭ بەلسەندى دامۋى بۇل ماسەلەنى كۇردەلەندىرىپ وتىر.
لۋدومانيانىڭ بەلگىلەرىنە ويىنعا جۇمسالعان ۋاقىت پەن قارجىنى باقىلاۋدىڭ بولماۋى، ۇتىلعان اقشانى قايتارۋعا ۇمتىلۋ، وتباسى مەن جۇمىستى ەلەمەۋ، تەك ويىن تۋرالى ويلاۋ جاتادى.
لۋدومانيامەن كۇرەسۋ جولدارى كوپ.
ءوزىن-ءوزى شەكتەۋ – قۇمار ويىندارعا كەتەتىن ۋاقىت پەن قارجىنى باقىلاۋ. كاسىبي كومەك الۋ – پسيحولوگ نەمەسە ارنايى قولداۋ ورتالىقتارىنا جۇگىنۋ. بوس ۋاقىتتى ءتيىمدى پايدالانۋ – سپورت، شىعارماشىلىق، پايدالى حوببيلەرگە دەن قويۋ.
جالعان اقپارات، قارجى پيراميدالارى، ينتەرنەت-الاياقتىق پەن لۋدومانيا – زاماناۋي قوعامداعى وزەكتى ماسەلەلەردىڭ ءبىرى. بۇل قاۋىپتەردەن قورعانۋ ءۇشىن اقپاراتتى تەكسەرىپ، قارجىلىق ساۋاتتىلىقتى ارتتىرىپ، ءوز ارەكەتتەرىمىزگە جاۋاپكەرشىلىكپەن قاراۋىمىز قاجەت.
ءاربىر ادام الاياقتىق سحەمالارعا ءتۇسىپ قالماۋ ءۇشىن سانالى شەشىم قابىلداپ، ساقتىق شارالارىن ۇستانۋى ءتيىس. ءبىزدىڭ قاۋىپسىزدىگىمىز – ءوز قولىمىزدا!
