الماتى قالاسىنىڭ المالى اۋدانىندا "Jetour" ماركالى كولىكتىڭ جۇرگىزۋشىسى جولدى رۇقسات ەتىلمەگەن جەرىنەن وتپەك بولعان جەتى جاستاعى بالانى قاعىپ كەتتى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
الماتى قالالىق پوليتسيا دەپارتامەنتىنىڭ كەزەكشىلىك ءبولىمى بەرگەن اقپاراتقا سايكەس، وقيعا بۇگىن، 15:30 شاماسىندا المالى اۋدانىندا بولعان. بايزاقوۆ كوشەسىمەن سولتۇستىك باعىتتا كەلە جاتقان «Jetour» كولىگىنىڭ جۇرگىزۋشىسى بوگەنباي باتىر كوشەسىنەن وڭتۇستىككە قاراي وتەتىن جەردەن جولدى كەسىپ ءوتىپ بارا جاتقان جەتى جاستاعى بالانى قاعىپ كەتكەن.
سوققىدان بالا قارسى باعىتتا كەلە جاتقان Hyundai كولىگىنىڭ ۇستىنە قۇلاپ ءتۇستى. العان جاراقاتتارىنىڭ سالدارىنان بالا وقيعا ورنىندا قازا تاپتى.
اتالعان فاكتى بويىنشا قىلمىستىق كودەكستىڭ 345-بابىنىڭ 3-بولىگى (ادام ولىمىنە اكەلگەن جول-كولىك وقيعاسى) بويىنشا تەرگەۋ باستالدى.
ايتا كەتەيىك، 2 ساۋىردە الماتىدا جۇك كولىگى جاياۋ جۇرگىنشىلەر جولىندا جەتى جاستاعى قىزدى قاعىپ ولتىرگەن بولاتىن. بۇگىن، 3 ساۋىردە قىز بالانىڭ دەنەسى جەر قوينىنا تاپسىرىلدى.
