ۋكراينانىڭ مەملەكەتتىك ء“ومىر سۇرگىم كەلەدى” جوباسى رەسەي جاعىندا ۋكرايناعا قارسى سوعىسقا قاتىسقان نەمەسە قاتىسىپ جاتقان 660-تان استام قازاقستان ازاماتىنىڭ ءتىزىمىن جاريالادى، دەپ حابارلايدى “ادىرنا” ۇلتتىق پورتالى “ازاتتىق راديوسىنا” سىلتەپ.
اتالعان تىزىمدە ازاماتتاردىڭ اتى-ءجونى، تۋعان جىلى، اسكەري كەلىسىمشارتقا وتىرعان كۇنى، جەتون ءنومىرى جانە قازا تاپقان كۇنى كورسەتىلگەن. جوبا مالىمەتىنشە، بۇل تىزىمدەگى 661 ادامنىڭ 78-ءى قازا تاپقان.
“بۇل – تەك بىزدە ناقتى دەرەكتەرى بار، ءولىم كۇنى مەن جەرلەنگەن ورنى بەلگىلى ازاماتتار. ۆولونتەرلەردىڭ مالىمەتىنشە، 2024 جىلدىڭ قازان ايىندا ۋكراينادا قازا تاپقان ەتنيكالىق قازاقتاردىڭ سانى 3000-نان اسقان”، – دەلىنگەن حابارلامادا.
جوبا بۇل ءتىزىمدى رەسەي ارمياسى قولباسشىلىعىنداعى “وزدەرىنىڭ ادامدارىنان” العانىن ايتادى. بۇل – الداعى ۋاقىتتا جاريالاناتىن شەتەلدىك جالدامالىلار تۋرالى مالىمەتتەردىڭ العاشقى بولىگى.
قازاقستان بيلىگى ءوز ازاماتتارىنىڭ ۋكرايناداعى سوعىسقا قاتىسۋى تۋرالى اقپاراتقا رەسمي تۇردە جاۋاپ بەرمەدى. قازاقستان ىشكى ىستەر ءمينيسترىنىڭ ورىنباسارى يگور لەپيوحا بۇل مالىمەتتەردىڭ ناقتىلىعىن تەكسەرۋ قاجەت ەكەنىن ايتتى.
“بۇل سانداردىڭ قانشالىقتى شىندىققا سايكەس كەلەتىنىن بىلمەيمىز. ولاردى تەكسەرۋ كەرەك. قازىر مەن ناقتى اقپارات بەرە المايمىن”، – دەدى لەپيوحا.
ايتا كەتەيىك، قازاقستاندا شەتەلدىك اسكەري قاقتىعىستارعا قاتىسقان ازاماتتار زاڭ بويىنشا جالدامالى جاۋىنگەر رەتىندە قىلمىستىق جاۋاپكەرشىلىككە تارتىلادى.
