قازاقستاننىڭ ۇلتتىق عىلىم اكادەمياسىنىڭ قۇرامىنا كىمدەر قابىلدانادى دەگەن سۇراق عالىمدار اراسىندا قىزۋ تالقىلانۋدا. وتكەن كەزەڭدەردە اكادەميكتەر قۇرامىندا نۇرسۇلتان نازارباەۆ، تالعات مۇساباەۆ، توقتار اۋباكىروۆ جانە وليگارح سەرىكجان سەيتجانوۆ سياقتى تانىمال تۇلعالار بولعانى بەلگىلى. وسى رەتتە، ولاردىڭ جاڭا قۇرىلاتىن اكادەمياعا وتەتىن-وتپەيتىنى جايلى «ۇلتتىق عىلىم اكادەمياسى» رەسپۋبليكالىق قوعامدىق بىرلەستىگىنىڭ پرەزيدەنتى مۇرات جۇرىنۇلى پىكىر ءبىلدىردى، دەپ حابارلايدى "ادىرنا" ۇلتتىق پورتالى Nege.kz-كە سىلتەپ.
مۇرات جۇرىنۇلىنىڭ ايتۋىنشا، نۇرسۇلتان نازارباەۆ، تالعات مۇساباەۆ، توقتار اۋباكىروۆ جانە سەرىكجان سەيتجانوۆ وزدەرىنىڭ عىلىمي ەڭبەكتەرى ءۇشىن زاڭدى تۇردە اكادەميك اتاعىن العان. بۇل تۇلعالار عىلىم كانديداتتارى رەتىندە اكادەميك بولىپ سايلانعان كەزدە، ولاردىڭ اتاعى جوعارى باعا مەن جابىق داۋىس بەرۋ ارقىلى بەكىتىلگەن. جۇرىنۇلى اتاپ وتكەنىندەي، نازارباەۆتىڭ ەكونوميكا عىلىمدارى سالاسىنداعى ەڭبەكتەرى ءوز الدىنا بولەك تاقىرىپ. ول ماسكەۋدە ءىرى عالىمداردىڭ الدىندا ديسسەرتاتسيا قورعاپ، «ەكونوميكا عىلىمدارىنىڭ دوكتورى» اتاعىن العان. ونىڭ قازاقستانداعى نارىقتىق ەكونوميكانى قۇرۋداعى ءرولى دە جوعارى باعالانعان. سوندىقتان نازارباەۆتىڭ اكادەميك اتاعىنا سايلانۋى زاڭدى قۇبىلىس دەپ ەسەپتەلەدى.
"نۇرسۇلتان نازارباەۆتىڭ عىلىم سالاسىنا جاساعان ەڭبەگىن ايتىپ بەرەيىن. ول ماسكەۋدە ءىرى عالىمداردىڭ الدىندا ديسسەرتاتسيا قورعاپ «ەكونوميكا عىلىمدارىنىڭ دوكتورى» اتاعىن ءبىراۋىزدان الدى. نازارباەۆ – قازاقستاندا نارىقتىق ەكونوميكانى قۇرعان ادام. سوندىقتان ول كىسىنىڭ اكادەميك بولىپ سايلانۋى – زاڭدى قۇبىلىس. ءتىپتى، ول پرەزيدەنت بولماسا دا، سول جۇمىستارى ءۇشىن اكادەميك بولىپ سايلانار ەدى. ال ونىڭ پرەزيدەنتتىك قىزمەتىنە، باسقا جاعىنا ەشتەڭە ايتا المايمىن، تەك عىلىمي تۇرعىدان جۇمىسىنا باعا بەرە الامىن. بىرەۋ بىلەر، بىرەۋ بىلمەس، نازارباەۆ بەلارۋس عىلىم اكادەمياسىنىڭ اكادەميگى، مگۋ-دىڭ پروفەسسورى. بىراق ول كىسى جاڭا اكادەمياعا وتە مە، جوق پا، ونى قازىرگى اكادەميانىڭ پرەزيدەنتى كۇرىشباەۆ شەشەدى. ءبىزدىڭ اكادەميا ەڭ سوڭعى جينالىسىن وتكىزدى. ەندى مەن اكادەميانى باسقارمايمىن", - دەپ جاۋاپ بەرگەن عالىم.
قازاقستاننىڭ ۇلتتىق عىلىم اكادەمياسىنىڭ تاريحى 1946 جىلدان باستاۋ الادى، ال ونىڭ العاشقى پرەزيدەنتى قانىش ساتباەۆ بولعانى بەلگىلى. سول ۋاقىتتاردا عالىمدار ەلدىڭ جەراستى بايلىقتارىن زەرتتەپ، مۇناي مەن گاز كەن ورىندارىن اشۋعا، مەتاللۋرگيا ءۇشىن قاجەت مينەرالداردى تابۋعا ۇلكەن ۇلەس قوسقان.
