شىمكەنتتە جاڭا «فوسفورشىلار مادەنيەت سارايى» عيماراتىنىڭ قۇرىلىسى باستالدى. بۇگىن قالا اكىمى عابيت سىزدىقبەكوۆ پەن «ءسابي» قايىرىمدىلىق قورىنىڭ نەگىزىن قالاۋشىلار – ەكولوگ اسەل تاسماعامبەتوۆا جانە كاسىپكەر كەڭەس راقىشەۆ ماڭىزدى نىساننىڭ قۇرىلىسى باستالعان جەرگە كاپسۋلا سالۋ راسىمىنە قاتىستى.
قالانىڭ مادەني ومىرىندە ەرەكشە ورىن الاتىن بۇل ورتالىق 1980 جىلى پايدالانۋعا بەرىلگەن. الايدا سوڭعى جىلدارى عيمارات قاراۋسىز قالىپ، 2023 جىلى كوممۋنالدىق مەنشىككە ءوتتى. ساراپشىلار زەرتتەۋ جۇرگىزە كەلە نىساندى بۇزۋ قاجەتتىگىن انىقتادى. وسىعان بايلانىستى شىمكەنت قالاسى اكىمدىگى «ءسابي» قورىنىڭ قولداۋىمەن سارايدى بۇزىپ، ورنىنا جاڭا مادەنيەت سارايىن سالۋ تۋرالى شەشىم قابىلدادى.
قالا اكىمى قاتىسۋشىلاردى ماڭىزى زور قۇرىلىستىڭ باستالۋىمەن قۇتتىقتاپ، «فوسفورشىلار مادەنيەت سارايى» ۇزاق ۋاقىت بويى قالانىڭ مادەني ورتالىعى بولعانىن اتاپ ءوتتى. ماماندار تاراپىنان جۇرگىزىلگەن زەرتتەۋ جۇمىستارى نەگىزىندە قۇرىلىستى قايتا جاڭعىرتۋعا شەشىم قابىلدانىپ، بۇل باستاماعا «ءسابي» قورىنىڭ نەگىزىن قالاۋشىلار قولداۋ كورسەتتى.
– شىمكەنتتىڭ باي تاريحى مەن بىرەگەي مادەني مۇراسى بار. قالادا ەكونوميكالىق وسۋىمگە، ينفراقۇرىلىمدى دامىتۋعا جانە تۇرعىنداردىڭ ءومىر ءسۇرۋ ساپاسىن جاقسارتۋعا ەرەكشە نازار اۋدارىلىپ، مەگاپوليس جالپى بارلىق باعىتتار بويىنشا قارقىندى دامىپ كەلەدى. بۇل نىساننىڭ قۇرىلىسى بولاشاققا جاسالعان ماڭىزدى ينۆەستيتسيا بولماق. جاڭا مادەنيەت سارايى قالانىڭ دامۋىنا سەرپىن بەرەتىن جاڭا مادەني ورتالىققا اينالادى، – دەدى ع.سىزدىقبەكوۆ.
«ءسابي» قورى 23 جىلدان بەرى مەديتسينا، ءبىلىم جانە مادەنيەت سالالارىندا كەشەندى زەرتتەۋلەرگە نەگىزدەلگەن جوبالاردى جۇيەلى تۇردە قولداپ كەلەدى. شىمكەنتتەگى ماڭىزدى نىساندى قايتا جاڭعىرتپاس بۇرىن، قور «شىمكەنت جانە «فوسفورشىلار مادەنيەت سارايى»: ءداستۇر، مودەرن جانە دامۋ نۇكتەلەرى» اتتى زەرتتەۋ جۇرگىزىپ، قالا تۇرعىندارىنىڭ الەۋمەتتىك داعدىلاردى دامىتۋ جانە ۇرپاقتار ساباقتاستىعىن قامتاماسىز ەتۋ قاجەتتىلىگىن انىقتادى.
– جاڭا “فوسفورشىلار مادەنيەت سارايى” – شىمكەنتتىڭ مادەني دامۋىنىڭ جاڭا كەزەڭى. بۇل تەك جاڭا داعدىلاردى مەڭگەرۋگە مۇمكىندىك بەرەتىن ءبىلىم بەرۋ ورتالىعى عانا ەمەس، سونىمەن قاتار، ءار جاستاعى تۇرعىنداردى بىرىكتىرەتىن قوعامدىق كەڭىستىك بولادى. دامۋ تۇجىرىمداماسىندا ۇرپاقتار اراسىنداعى مادەني بايلانىستى نىعايتۋ مەن داستۇرلەردى ساقتاۋعا ەرەكشە ءمان بەردىك، – دەدى اسەل تاسماعامبەتوۆا.
جاڭا مادەنيەت سارايى بىرنەشە باعىتتى قامتيتىن كوپسالالى ورتالىق بولماق. مۇندا IT-حاب، كرەاتيۆتى حاب جانە قوعامدىق باستامالار حابى جۇمىس ىستەيدى. قالا تۇرعىندارى ءۇشىن كرەاتيۆتى يندۋستريا الاڭدارى، سۋرەتشىلەر شەبەرحاناسى، كورمە زالى، امفيتەاتر، كوۆوركينگ، كەڭسە بولمەلەرى، فورۋم الاڭى، ءسان كورسەتىلىمىنە ارنالعان ترانسفورمەر-ساحنا، بيزنەس-ينكۋباتور، فوتو جانە ۆيدەوستۋديا، دىبىس جازۋ ستۋدياسى، پودكاست الاڭى، كونفەرەنتس-زال، سونداي-اق، ەكولوگيالىق باستامالار مەن اتا-انالار كلۋبتارى سەكىلدى قالالىق قاۋىمداستىقتاردىڭ فيليالدارى قولجەتىمدى بولادى. سونداي-اق، بولاشاققا قاجەتتى داعدىلاردى دامىتۋعا ەرەكشە كوڭىل بولىنەدى. اتاپ ايتقاندا، IT-مودەلدەۋ جانە روبوتوتەحنيكا، تۇرمىستىق شارۋاشىلىق، رۋنيكالىق جازۋ، دومبىرا تارتۋ، شاحمات، باسسەين، ۇلكەن تەننيس، فۋتبول، كۇرەس، كوركەم گيمناستيكا، جاتتىعۋ زالى مەن بي ساباقتارى ۇيىمداستىرىلادى.
«ءسابي» قورىنىڭ تاپسىرىسى بويىنشا جاڭا مادەنيەت سارايىنىڭ ديزاينى ازىرلەندى. جوبادا شىمكەنتكە ءتان تاريحي جانە زاماناۋي ەلەمەنتتەر ۇيلەستىرىلەدى. جاڭعىرتۋ جوسپارىنا سايكەس، نىسان ماڭىنداعى اۋماق تا كەشەندى تۇردە اباتتاندىرىلادى. مۇندا ساياباق الاڭدارى، اللەيالار، سۋبۇرقاقتار جانە زاماناۋي بالالار الاڭدارى سالىنىپ، قالا تۇرعىندارى مەن قوناقتارى ءۇشىن جايلى كەڭىستىك جاسالادى.
