بيىلعى جىلدىڭ توعىز ايىنىڭ قورىتىندىسى بويىنشا باتىس قازاقستان وبلىسىنىڭ وڭدەۋ ونەركاسىبىندەگى ءوندىرىس كولەمى 274,7 ملرد تەڭگەنى قۇرادى. بۇل كورسەتكىش وتكەن جىلدان الدەقايدا جوعارى. جانە جىل سوڭىنا دەيىن جوسپار ءجۇز پايىزعا ورىندالادى. بۇل تۋرالى بقو كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆ مالىمدەدى.
سوڭعى جىلدارى وبلىستىڭ وڭدەۋ ونەركاسىبى سالاسىندا تۇراقتى ءوسىم بايقالىپ، ءوندىرىس كولەمى مەن ءونىم ساپاسى ارتىپ كەلەدى. بۇل ءوز كەزەگىندە ءوڭىردىڭ ەكونوميكالىق الەۋەتىن كۇشەيتىپ، جاڭا ينۆەستيتسيالىق جوبالاردى جۇزەگە اسىرۋعا مۇمكىندىك بەرۋدە. وڭدەۋ ونەركاسىبىندەگى ءوندىرىس كولەمىن ارتتىرۋ جانە جىلدىق جوسپارلاردى تولىق ورىنداۋ ماقساتىندا بيىل جالپى سوماسى 9,4 ملرد تەڭگەنى قۇرايتىن ءتورت جاڭا جوبا ىسكە قوسىلۋعا دايىن.
ولار: ارالاس ونىمدەر شىعاراتىن زاۋىت قۇرىلىسى، قۇرعاق قوسپالار ءوندىرىسى، حيميالىق ونىمدەر (انتيفريز، ۇنتاق، سابىن جانە باسقا) ءوندىرىسى جانە اليۋميني سىمدارىن ءوندىرۋ جوبالارى.
جۇمىس ورىندارىن اشۋ – ەكونوميكاعا تىڭ سەرپىن
الەمدىك ەكونوميكا جىل سايىن وزگەرىپ، دامىپ كەلە جاتقان سايىن، جۇمىس ورىندارىنىڭ سانى مەن ساپاسى دا ماڭىزدى فاكتورعا اينالىپ وتىر. جاڭا جۇمىس ورىندارىن قۇرۋ – تەك جۇمىسسىزدىقتى ازايتىپ قانا قويماي، ەلدىڭ ەكونوميكالىق دامۋىندا جاڭا سەرپىن بەرەدى. بۇل پروتسەسس ەكونوميكانىڭ بارلىق سالالارىندا وندىرىستىك قۋاتتىڭ ارتۋىنا، جاڭا ينۆەستيتسيالاردىڭ تارتىلۋىنا، سونداي-اق حالىقتىڭ الەۋمەتتىك جاعدايىنىڭ جاقسارۋىنا مۇمكىندىك جاسايدى.
جۇمىس ورىندارىنىڭ كوپتىگى ەلدە جالپى ىشكى ءونىمنىڭ ء(جىو) وسۋىنە ىقپال ەتىپ، جاڭا تەحنولوگيالار مەن يننوۆاتسيالاردىڭ ەنگىزىلۋىنە جول اشادى. سونىمەن قاتار، ولار حالىقتىڭ تۇراقتى تابىس كوزىمەن قامتاماسىز ەتىلۋىن قامتاماسىز ەتىپ، الەۋمەتتىك تۇراقتىلىقتى نىعايتادى.
جاڭا جۇمىس ورىندارىنىڭ پايدا بولۋى ەكونوميكاعا تىڭ سەرپىن بەرىپ، ونى داعدارىسقا قارسى تۇراقتى دامۋعا باعىتتايدى. وسى تۇرعىدان العاندا، جۇمىس ورىندارىن قۇرۋ – الەۋمەتتىك جانە ەكونوميكالىق دامۋ ءۇشىن باستى قۇرالداردىڭ ءبىرى بولىپ تابىلادى.
اقجايىق وڭىرىندە وڭدەۋ ونەركاسىبىندەگى ءوندىرىس كولەمىن ارتتىرۋعا قازىرگى كاسىپورىنداردىڭ جاڭعىرتۋ جۇمىستارى مەن ءونىم اسسورتيمەنتىن كەڭەيتۋ دە وڭ ىقپال ەتۋدە. بقو كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆتىڭ بەرگەن اقپاراتىنا سۇيەنەر بولساق، «QazExpoPipe» جشس قاپتامالىق جانە سوراپ-كومپرەسسورلىق مۋفتالار شىعارۋ جوباسىن جۇزەگە اسىرۋدا. «باتىس مۇناي گاز جابدىقتارى» جشس سۋ جانە گازعا ارنالعان شارلى كراندار شىعاراتىن تسەح ىسكە قوستى، سونداي-اق كادر دايارلاۋعا ارنالعان وقۋ ورتالىعى اشىلدى. «ورال ساۋدا-ونەركاسىپ كومپانياسى» جشس ديامەترى 1600 مم-گە دەيىنگى گاز، سۋ جانە كارىز قۇبىرلارىنا ارنالعان ءۇش قاباتتى قۇبىر ءوندىرۋ جابدىقتارىن جەتكىزۋ كۇتىلۋدە. «ستەكلوسەرۆيس» جشس ساندىق باعدارلامالىق باسقارۋ جۇيەسىمەن جابدىقتالعان ADVANCE 526 امبەباپ تىك وڭدەۋ ورتالىعى جانە Master One ۇلگىسىندەگى شىنى وڭدەۋگە ارنالعان چپۋ ورتالىعىن ىسكە قوستى.
ءوسىمنىڭ رەزەرۆى رەتىندە 2024 جىلى ىسكە قوسىلعان جوبالاردىڭ جوبالىق قۋاتىنا شىعۋ قاراستىرىلعان. «Westgroup» جشس جىلىنا 20 ملن دانا كىرپىش شىعارادى. «كاسپيمۋنايكاپيتال» جشس جىلىنا 53 مىڭ دانا مۇناي-گاز جابدىقتارىن شىعارادى. «BATYSMINIRALSU» جشس جىلىنا 10 ملن ليتر مينەرالدى سۋ ءوندىرىسىن جوسپارلاپ وتىر. «ورال ءسۇت كومبيناتى» جشس ءسۇت وڭدەۋ زاۋىتىنىڭ كەڭەيۋىن جۇزەگە اسىرادى. كەلەسى كەزەڭدە 2026–2030 جىلدار ارالىعىندا جالپى قۇنى 1,8 ترلن تەڭگە بولاتىن 25 جوبانى جۇزەگە اسىرۋ جوسپارلانىپ وتىر، ناتيجەسىندە 6012 جاڭا جۇمىس ورنى اشىلماق، – دەدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆ ساپارگەلدىۇلى.
باسقارما باسشىسىنىڭ ايتۋىنشا، وڭدەۋ ونەركاسىبىنىڭ كاسىپورىندارىن تولىق كولەمدە جۇمىسقا قامتاماسىز ەتۋ ءۇشىن ءىرى جەر قويناۋىن پايدالانۋشىلارمەن تۇراقتى كەزدەسۋلەر وتكىزىلۋدە. مىسالى، اتىراۋدا وتكەن ماشينا جاساۋ فورۋمىندا نكوك كومپانياسىمەن جانە «ۋرالسكاگرورەمماش» اق-پەن بىرنەشە تەحنيكانى جەتكىزۋ تۋرالى كەلىسىمدەر جاسالىپتى. سونىمەن قاتار، 2025 جىلعى ءساۋىر ايىندا وتكىزىلگەن وڭدەۋ ونەركاسىبى كاسىپورىندارىنىڭ فورۋمى مەن كورمەسى ناتيجەسىندە جاڭا كەلىسىمدەرگە قول قويىلعان. ناتيجەسىندە «ورالاگرورەمماش» اق ءبىر دانا ءورت ءسوندىرۋ تەحنيكاسىن جەتكىزسە، «ۆەستويل» جشس مۇناي مەن گازدىڭ ساپاسى مەن مولشەرىن باقىلاۋ جۇيەلەرىن جەتكىزۋگە مۇمكىندىك العان.
وڭدەۋ ونەركاسىبىندە جاڭا سەرپىن: ءىرى كومپانيالار ينۆەستيتسيا قۇيعان
2025 جىلى وبلىسقا بىرقاتار ءىرى حالىقارالىق كومپانيالار كەلىپ، وڭدەۋ ونەركاسىبىن دامىتۋعا باعىتتالعان ماڭىزدى جوبالارمەن جۇمىس جاساۋعا نيەت ءبىلدىرىپتى. ولاردىڭ قاتارىندا «Kalamkas — Khazar Operating b.v.»، «كمگ ينجينيرينگ» جشس، «North Caspian Operating Company» جانە IMB كومپانيالارى بار. بۇل ۇيىمدار وڭدەۋ سالاسىنا جاڭا ينۆەستيتسيالار مەن سەرىكتەستىكتەردىڭ بولاشاق مۇمكىندىكتەرىن قاراستىرۋدا. اسىرەسە، وڭدەۋ ونەركاسىبىنە باعىتتالعان تىڭ جوبالار مەن ينۆەستيتسيالىق كەلىسىمدەر وبلىستىڭ ەكونوميكالىق دامۋىنداعى جاڭا كەزەڭنىڭ باستالاتىنىن بىلدىرەدى.
وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆتىڭ پىكىرىنشە، وسى كومپانيالاردىڭ وڭىرگە كەلۋى وڭدەۋ سالاسىنىڭ جاڭا تەحنولوگيالار مەن كاسىبي داعدىلاردى تارتۋعا مۇمكىندىك بەرىپ، وندىرىستىك قۋاتتىڭ ارتىلۋىنا ىقپال ەتەدى. بۇل قادام ەلدىڭ ەكونوميكاسىنا تىڭ سەرپىن بەرىپ قانا قويماي، ءوڭىردىڭ جۇمىسسىزدىق دەڭگەيىن تومەندەتۋگە، جەرگىلىكتى تۇرعىندارعا جاڭا جۇمىس ورىندارىن اشۋعا دا اسەر ەتەتىن بولادى.
