جاڭاقالا اۋدانىنىڭ ورتالىعىندا جالعىز ءۇيى اپاتتى دەپ تانىلعان 14 وتباسى باسپانالى بولدى. پاتەر كىلتتەرىن تابىستاۋ راسىمىنە ايماق باسشىسى ناريمان تورەعاليەۆ، وبلىستىق ءماسليحات دەپۋتاتى، جاڭاقالا اۋدانىنىڭ قۇرمەتتى ازاماتى ەربول سالىقوۆ، مەردىگەر ۇيىم وكىلدەرى جانە اۋىل تۇرعىندارى قاتىستى.
بيىل جالعىز ءۇيى اپاتتى دەپ تانىلعان ازاماتتاردى باسپانامەن قامتۋ تەتىكتەرى زاڭنامالىق تۇرعىدا رەتتەلىپ، «رەنوۆاتسيا» باعدارلاماسىنا ءتيىستى تولىقتىرۋلار ەنگىزىلدى. جاڭاقالا اۋدانىندا وسى سانات بويىنشا 52 تۇرعىن كەزەكتە تۇر. بۇگىن ولاردىڭ 14-ءى ەسكى باسپاناسىنىڭ ورنىنا بوي كوتەرگەن جاڭا ۇيگە ورنالاستى. كوپ ۇزاماي اۋداننىڭ 3 ەلدى مەكەنىندە تاعى 7 پاتەر پايدالانۋعا بەرىلەدى.
وبلىس اكىمى ناريمان تورەعاليەۆ جاڭا قونىس يەلەرىن قۋانىشىمەن قۇتتىقتادى. ايماق باسشىسى حالىقتى باسپانامەن قامتۋ مەملەكەت ساياساتىنىڭ باسىم باعىتى ەكەنىن اتاپ ءوتتى.
- مەملەكەت باسشىسى قاسىم-جومارت كەمەلۇلى توقاەۆ حالىقتىڭ ءومىر ساپاسىن ارتتىرۋعا باعىتتالعان ناقتى مىندەتتەر جۇكتەدى. سونىڭ ءبىرى — اۋىلدىق ەلدى مەكەندەردەگى ينفراقۇرىلىمدى دامىتۋ، تۇرعىن ءۇي قۇرىلىسىن جانداندىرۋ. بيىلدان باستاپ جالعىز ءۇيى اپاتتى دەپ تانىلعان ازاماتتاردى باسپانامەن قامتۋعا ەرەكشە نازار اۋدارىلدى. وسى ساناتتاعى وتباسىلارعا ورال قالاسىن ايتپاعاندا، سىرىم جانە تاسقالا اۋداندارىندا جاڭا پاتەرلەر بەرەمىز. شاڭىراقتارىڭىز شاتتىققا تولىپ، باق-بەرەكەلى بولعاي، - دەدى ناريمان تورەعاليەۆ.
اۋىل تۇرعىندارى مەملەكەت قولداۋى ءۇشىن زور ريزاشىلىعىن ءبىلدىرىپ، قۇرىلىستىڭ باسى-قاسىندا بولعان ازاماتتارعا العىس ايتتى.
ايتا كەتەيىك، 2023 جىلدان بەرى وڭىردە 7 مىڭنان استام پاتەر پايدالانۋعا بەرىلدى. ونىڭ 40 پايىزى اۋىلدىق ەلدى مەكەندەردە بوي كوتەردى.
بقو اكىمىنىڭ ءباسپاسوز قىزمەتى
