«شاڭىراق» بالالار ءۇيىنىڭ تۇلەكتەرى جەرگىلىكتى تۇرعىن ءۇي كەزەگىندە تۇرعان حالىقتىڭ ءال-اۋقاتىن جاقسارتۋ ماقساتىندا الەۋمەتتىك تۇرعىن ءۇي قۇرىلىسىنا باتىس قازاقستان وبلىسى اكىمى عالي ەسقاليەۆتەن كومەك كورسەتۋىن سۇرادى، دەپ حابارلايدى “ادىرنا” ۇلتتىق پورتالى.
“بالالار ۇيىنەن شىققاندىقتان بىزدە تۇرعىلىقتى ورىن جوق. بىزگە پاتەر جالداپ تۇرۋ، ونىڭ اقىسىن تولەۋ قيىنعا سوعادى. ال جالدامالى پاتەرلەردى ودان ءارى سالۋ بيىل جوسپاردا جوق ەكەن. ونىڭ ورنىنا تۇرعىن ءۇي جالداۋ اقىسىن سۋبسيديالاۋ تەتىگى تۇر”،- دەدى “شاڭىراق” بالالار ءۇيىنىڭ تۇلەگى.
زاڭ بويىنشا، 2010 جىلدان باستاپ حالىقتىڭ الەۋمەتتىك وسال توپتارىنا جاتاتىن، تۇرعىن ۇيگە مۇقتاجدار اراسىنان جەتىم جانە اتا-اناسىنىڭ قامقورلىعىنسىز قالعان بالالار باسپانا كەزەگىن كۇتۋدە. الايدا، جىل سايىن كەزەكتە تۇرعاندار سانى ارتىپ كەلەدى. جالعا بەرىلەتىن تۇرعىن ءۇي قۇرىلىسىن توقتاتىپ، ونى جالعا بەرۋدى سۋبسيديالاۋ تەتىگىمەن اۋىستىرۋ كەزەكتە تۇرعانداردىڭ بولاشاقتا باسپانا الۋعا زاڭدى قۇقىعىن بۇزۋدا.
بالالار ءۇيىنىڭ تۇلەكتەرىنىڭ ايتۋىنشا، جالعا بەرىلەتىن تۇرعىن ءۇي قۇرىلىسىن توقتاتۋ بىرقاتار كەلەڭسىز فاكتورلارعا اكەپ سوقتىرۋى مۇمكىن. ماسەلەن، كوممەرتسيالىق تۇرعىن ءۇي قۇنىنىڭ ودان ءارى قىمباتتاۋى. ول قىمباتتاسا بالالار ۇشىن مۇلدە تۇرعىن ءۇي قولجەتىمسىز بولماق.
“تۇرعىن ءۇيدى سۋبسيديالاۋدى «ۋاقىتشا» شارا دەپ ەسەپتەيمىز. بۇل رەتتە ازاماتتاردى تۇراقتى الەۋمەتتىك باسپانامەن قامتاماسىز ەتۋ ماسەلەسى شەشىلمەيدى.
قۇرمەتتى اكىم مىرزا، جالعا بەرىلەتىن الەۋمەتتىك تۇرعىن ءۇي قۇرىلىسىن قالپىنا كەلتىرۋگە ىقپال ەتۋىڭىزدى سۇرايمىز! ءبىزدىڭ اتا-انامىز، تۋعان-تۋىستارىمىز بەن جاقىندارىمىز جوق. ءسىز جالعىز قولداۋشىمىزسىز! بار ءۇمىتىمىز سىزدە! “،- دەپ اكىمنەن كومەك سۇرادى.
“ادىرنا” ۇلتتىق پورتالى
