قازاقستاننىڭ سولتۇستىگىندەگى ەرەكشە تابيعي نىسان – تەكە كولى مەملەكەت مەنشىگىنە قايتارىلدى. ونىڭ كاداسترلىق قۇنى 26,7 ميلليارد تەڭگەگە باعالانىپ وتىر. بۇل تۋرالى سولتۇستىك قازاقستان وبلىسىنىڭ پروكۋراتۋراسى حابارلادى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
2020 جىلى تەكە كولى جەرگىلىكتى اتقارۋشى ورگانداردىڭ شەشىمىمەن اس تۇزىن ءوندىرۋ ماقساتىندا جەر قويناۋىن پايدالانۋشى كومپانياعا بەرىلگەن. جالپى اۋدانى 21,5 مىڭ گەكتاردى قۇرايتىن سۋ ايدىنىنا كەيىننەن جالداۋ كەلىسىمى جاسالعان.
الايدا 2022 جىلى كەلىسىمشارتتىڭ مەرزىمى اياقتالسا دا، جەرگىلىكتى ورگاندار بۇل كەلىسىمدى بۇزۋ ءۇشىن ەشقانداي شارا قابىلداماعان. پروكۋراتۋرانىڭ مالىمەتىنشە، بۇل جەر كودەكسىن بۇزۋشىلىق بولىپ تابىلادى جانە سۋ قورى جەرلەرىن ماقساتسىز پايدالانۋعا اكەلگەن.
سونىمەن قاتار، "جەر قويناۋى جانە جەر قويناۋىن پايدالانۋ تۋرالى" كودەكستىڭ تالاپتارىنا قايشى، بۇل كاسىپورىن رەسمي سايتتاعى جەر قويناۋىن پايدالانۋشىلار تىزىمىنەن شىعارىلماعان.
ارنايى تابيعاتتى قورعاۋ پروكۋرورىنىڭ ارالاسۋىمەن جەردى جالعا بەرۋ تۋرالى كەلىسىم بىرجاقتى تارتىپتە بۇزىلدى. وسىلايشا، اششى-سۋلى كول مەملەكەت مەنشىگىنە قايتارىلدى.
مەملەكەتتىك ورگاندار ينتەرنەت-رەسۋرستارداعى مالىمەتتەردى جاڭارتىپ، زاڭ بۇزعان لاۋازىمدى تۇلعالاردى تارتىپتىك جاۋاپكەرشىلىككە تارتتى.
