قازاقستان مەن تۇركيا ءوزارا تاۋار اينالىمىن 15 ملرد دوللارعا دەيىن ۇلعايتىپ، ينۆەستيتسيالىق ىنتىماقتاستىقتى جانداندىرۋدى جوسپارلاپ وتىر. بۇل تۋرالى تۇركيا پرەزيدەنتى رەجەپ تايپ ەردوعان قازاقستان پرەزيدەنتى قاسىم-جومارت توقاەۆپەن كەلىسسوزدەر بارىسىندا مالىمدەدى، دەپ حابارلايدى «ادىرنا» ءتىلشىسى.
ەكى ەل باسشىسىنىڭ كەزدەسۋى الدىمەن شاعىن قۇرامدا، كەيىن كەڭەيتىلگەن قۇرامدا ءوتتى.
ء«بىز تاۋار اينالىمىن 15 ملرد دوللارعا دەيىن جەتكىزىپ، ەكىجاقتى قارىم-قاتىناستاردىڭ ينۆەستيتسيالىق باعىتىن جانداندىرۋدى كوزدەپ وتىرمىز»، – دەدى ەردوعان.
تۇركيا پرەزيدەنتى بيىل مامىر ايىندا استاناعا جاساعان ساپارى كەزىندە تاراپتار بىرقاتار ماڭىزدى قۇجاتقا، سونىڭ ىشىندە ماڭگىلىك دوستىق جانە كەڭەيتىلگەن ستراتەگيالىق ارىپتەستىك تۋرالى دەكلاراتسياعا قول قويعانىن ەسكە سالدى.
ونىڭ ايتۋىنشا، الداعى ىنتىماقتاستىقتى نىعايتۋ جونىندەگى ناقتى قادامدار ستراتەگيالىق ىنتىماقتاستىق كەڭەسىنىڭ كەلەسى وتىرىسى اياسىندا قاراستىرىلادى.
كەلىسسوزدەر بارىسىندا تاراپتار كولىك جانە لوگيستيكا، ەنەرگەتيكا، جاساندى ينتەللەكت، اۋىل شارۋاشىلىعى جانە قورعانىس ونەركاسىبى سالالارىنداعى ىنتىماقتاستىقتى دامىتۋ ماسەلەلەرىن تالقىلادى. سونداي-اق ينۆەستيتسيالىق جانە مادەني-گۋمانيتارلىق بايلانىستارعا ەرەكشە نازار اۋدارىلدى.
ءوز كەزەگىندە قاسىم-جومارت توقاەۆ تۇركيا قازاقستاننىڭ ءىرى بەس ساۋدا سەرىكتەسىنىڭ جانە ون ءىرى ينۆەستورىنىڭ قاتارىنا كىرەتىنىن اتاپ ءوتتى.
ء«بىز تۇركيالىق ارىپتەستەرىمىزگە جان-جاقتى قولداۋ كورسەتۋگە جانە ولاردىڭ بيزنەسى ءۇشىن قولايلى جاعداي جاساۋعا دايىنبىز»، – دەدى ول.
سونىمەن قاتار كەزدەسۋ بارىسىندا تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
