Qazaqstannyń soltústigindegi erekshe tabıǵı nysan – Teke kóli memleket menshigine qaıtaryldy. Onyń kadastrlyq quny 26,7 mıllıard teńgege baǵalanyp otyr. Bul týraly Soltústik Qazaqstan oblysynyń prokýratýrasy habarlady, dep habarlaıdy "Adyrna" ulttyq portaly Tengrinews.kz-ke siltep.
2020 jyly Teke kóli jergilikti atqarýshy organdardyń sheshimimen as tuzyn óndirý maqsatynda jer qoınaýyn paıdalanýshy kompanııaǵa berilgen. Jalpy aýdany 21,5 myń gektardy quraıtyn sý aıdynyna keıinnen jaldaý kelisimi jasalǵan.
Alaıda 2022 jyly kelisimsharttyń merzimi aıaqtalsa da, jergilikti organdar bul kelisimdi buzý úshin eshqandaı shara qabyldamaǵan. Prokýratýranyń málimetinshe, bul Jer kodeksin buzýshylyq bolyp tabylady jáne sý qory jerlerin maqsatsyz paıdalanýǵa ákelgen.
Sonymen qatar, "Jer qoınaýy jáne jer qoınaýyn paıdalaný týraly" kodekstiń talaptaryna qaıshy, bul kásiporyn resmı saıttaǵy jer qoınaýyn paıdalanýshylar tiziminen shyǵarylmaǵan.
Arnaıy tabıǵatty qorǵaý prokýrorynyń aralasýymen jerdi jalǵa berý týraly kelisim birjaqty tártipte buzyldy. Osylaısha, ay-sýly kól memleket menshigine qaıtaryldy.
Memlekettik organdar ınternet-resýrstardaǵy málimetterdi jańartyp, zań buzǵan laýazymdy tulǵalardy tártiptik jaýapkershilikke tartty.
