5-ءشى دۇنيەجۇزىلىك كوشپەندىلەر ويىندارى قارساڭىندا قازاقستان رەسپۋبليكاسىنىڭ ۇلتتىق سپورت قاۋىمداستىعى جانە قازاقستان جازۋشىلار وداعى بىرلەسە وتىرىپ قالامگەرلەر اراسىندا «قۇلاگەر» رەسپۋبليكالىق ادەبي بايقاۋىن جاريالادى.
بايقاۋدىڭ نەگىزگى ماقساتى – ۇلتتىق سپورتتى ناسيحاتتاۋ جانە قالامگەرلەرگە قولداۋ كورسەتۋ، ولاردى ۇلتتىق سپورت تۇرلەرى تۋرالى جاڭا تۋىندىلاردى جازۋعا ىنتالاندىرۋ.
وسىعان وراي الماتىداعى قازاقستان جازۋشىلار وداعىندا وتكەن جيىندا ادەبي بايقاۋ رەسمي تۇردە جاريالاندى. كەزدەسۋگە قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، سونداي-اق ءاسانالى ءاشىموۆ، دۋلات يسابەكوۆ، سماعۇل ەلۋباي, بەكسۇلتان نۇرجەكەەۆ، قاناز مولداحمەتسىندى زيالى قاۋىم وكىلدەرى مەن قوعام قايراتكەرلەرى قاتىستى. سونىمەن قاتار، بۇكىل الەمدى تاڭقالدىرىپ جۇرگەن، قازاقتان شىققان حالىقارالىق دارەجەدەگى تۇڭعىش شاباندوز باۋىرجان مىرزاباەۆ شارانىڭ قۇرمەتتى قوناعى بولدى.
قازاقستان جازۋشىلار وداعى باسقارما توراعاسى مەرەكە قۇلكەنوۆ كوركەم ادەبيەتتە ۇلتتىق مۇددەگە ساي كەلەتىن تۋىندىلاردىڭ ۇلەسىن ارتتىرۋ قاجەت ەكەنىن اتاپ ءوتتى.
«ونەردىڭ ىشىندەگى ەڭ ءبىر قاستەرلىسى – كوركەم ادەبيەت. سوندىقتان شىعارماشىلىق زيالى قاۋىم، جازۋشى قاۋىم وكىلدەرى ءۇشىن «قۇلاگەر» ادەبي بايقاۋىنىڭ ماڭىزى زور. وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن وياتۋعا بار كۇش-جىگەرىمىزدى سالامىز»، - دەدى مەرەكە قۇلكەنوۆ.
ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ رەسپۋبليكالىق ادەبي بايقاۋدىڭ ماڭىزىنا توقتالدى.
«مەملەكەت باسشىسى قاسىم-جومارت كەمەلۇلى توقاەۆ ۇلتتىق يدەولوگيا مەن جاڭا قوعامدىق ەتيكانى قالىپتاستىرۋعا باس نازار اۋدارعانى بەلگىلى. بۇل رەتتە بيىل وتەتىن 5-ءشى دۇنيەجۇزىلىك كوشپەندىلەر ويىندارى قارساڭىندا قالامگەرلەر اراسىندا «قۇلاگەر» رەسپۋبليكالىق بايقاۋىنىڭ جاريالانۋى قۋانىشتى جاڭالىق. ارينە، بايقاۋ اتاۋى كەزدەيسوق تاڭدالماعانى بەلگىلى. ويتكەنى ءىلياس جانسۇگىروۆتىڭ «قۇلاگەرى» – ەشقاشان ەسكىرمەيتىن، ماڭگى جاس پوەزيا. قازاق ادەبيەتىنە جاڭا ەسىمدەر مەن تىڭ تۋىندىلار قوسىلىپ، ۇلتتىق ادەبيەتىمىزدى بايىتا تۇسەدى دەگەن سەنىمدەمىن»، - دەدى يسلامبەك سالجانوۆ.
سونىمەن قاتار، ۇلتتىق سپورت قاۋىمداستىعىنىڭ پرەزيدەنتى «قازاق ادەبيەتى» گازەتى ۇجىمىن باسىلىمنىڭ 90 جىلدىق مەرەيتويىمەن قۇتتىقتادى.
ايتا كەتەيىك، بايقاۋعا ءوتىنىم قابىلداۋ 2024 جىلعى 22 قاڭتار مەن 22 ماۋسىم ارالىعىندا وتەدى.
بايقاۋعا قاتىساتىن جۇمىستار ۇلتتىق سپورت تۇرلەرىنە ارنالۋى شارت. كونكۋرستىق شىعارمالار ۇلتتىق سپورت قاۋىمداستىعى قۇرامىنا رەسمي تۇردە كىرەتىن «تەڭگە ءىلۋ»، «بايگە»، «جامبى اتۋ»، «اۋدارىسپاق»، «كوكپار»، «توعىزقۇمالاق»، «قۇسبەگىلىك»، «ساداق اتۋ»، «اسىق اتۋ»، «جورىق» سپورت تۇرلەرىن باستى تاقىرىپ ەتۋى كەرەك. سونىمەن قاتار، قاتىسۋشىلاردىڭ جاسىنا شەكتەۋ قويىلمايدى.
بايقاۋدا مىناداي نوميناتسيالار بولادى:
1. ۇزدىك پوەزيا
2. ۇزدىك پروزا
3. بالالارعا ارنالعان ۇزدىك شىعارما
4. ۇزدىك كوميكس
5. ۇزدىك دراما
6. ۇزدىك دەرەكتى پروزا
7. ۇزدىك فانتاستيكالىق/ميفولوگيالىق شىعارما
بايقاۋعا بۇرىن ەش جەردە جاريالانباعان، تەك قانا وسى جىلعى قاڭتار مەن ماۋسىم ارالىعىندا جازىلعان جاڭا شىعارمالار قابىلدانادى.
ءار نوميناتسيا بويىنشا ۇزدىك دەپ تانىلعان تۋىندىنىڭ اۆتورى جەءڭىمپاز اتانىپ، وعان «قۇلاگەر» بايقاۋىنىڭ اۆتورلىق مۇسىنشەسى جانە ۇلتتىق سپورت قاۋىمداستىعى 2 000 000 (ەكى ميلليون) تەڭگە كولەمىندە قارجىلاي سىياقى بەرىلەدى.
جەڭىمپازدار قازىلار القاسىنىڭ شەشىمىمەن انىقتالىپ، تامىز ايىندا ماراپاتتالادى.
بايقاۋعا قاتىسۋعا ءوتىنىم بەرۋ ءۇشىن http://qulager.ultsport.kz/ سايتىندا ساۋالنامانى تولتىرىپ، شىعارمانى جۇكتەۋ قاجەت. تولىق اقپاراتتى qulagerultsport@gmail.com ەلەكتروندىق پوشتاسى ارقىلى ۇيىمداستىرۋ كوميتەتىنەن نەمەسە كورسەتىلگەن بايلانىس تەلەفوندارى ارقىلى بىلۋگە بولادى: +7 700 098 2025 (جۇلدىز ورازىمبەت), +7 701 516 5584 (حاديشا ەرسەيتوۆا).
