Mańǵystaý oblysyndaǵy Mańǵyshlaq stanııasynan Aqtaý teńiz portyna deıingi magıstraldyq temirjol jelisi memleket menshigine qaıtarylady, dep habarlaıdy "Adyrna" ulttyq portaly QazTAG-qa siltep.
Bul sheshimdi Mańǵystaý oblysynyń mamandandyrylǵan aýdanaralyq ekonomıkalyq soty 14 naýryzda qabyldady.
Prokýratýranyń málimetinshe, «Kaskor-Transservıs» AQ atalǵan temirjol jelisin ıeliginde zańsyz ustap kelgen. Qazaqstan zańnamasyna sáıkes, magıstraldyq temirjol jelileri memlekettik menshikte bolýy tıis. Osyǵan baılanysty kólik mınıstrligi sotqa talap aryz berip, ony tolyq kólemde qanaǵattandyrdy.
«Bul sheshim – elimizdiń kólik ınfraqurylymyn turaqty damytý jáne temirjol júıesiniń strategııalyq nysandaryn memleket baqylaýyna alý úshin mańyzdy qadam», – dep málimdedi Bas kólik prokýratýrasy.
Atalǵan kompanııa Nurtaı Ábiqaev pen Jaqsybek Kúlekeevke jaqyn adamdarǵa tıesili. Qarjy mınıstrliginiń derekterine sáıkes, kompanııanyń affılıırlengen tulǵalary qatarynda 2010 jyldan beri Nurtaı Ábiqaevtyń uly – Marat Ábiqaev bar. Al Jaqsybek Kúlekeev 2021 jyldan beri kompanııanyń dırektorlar keńesiniń múshesi.
Jaqsybek Kúlekeev – Eýrazııa ulttyq ýnıversıtetiniń dırektorlar keńesiniń tóraǵasy jáne Prezıdent janyndaǵy áleýmettik-ekonomıkalyq reformalardy monıtorıngteý jáne taldaý ortalyǵynyń múshesi. Buryn ol joǵary memlekettik qyzmetter atqarǵan.
2008 jyly «Qazaqstan temir joly» ulttyq kompanııasynyń prezıdenti bolǵan kezde laýazymdyq ókilettigin teris paıdalaný boıynsha aıyptalyp, úsh jylǵa bas bostandyǵynan aıyrylǵan. Ol memlekettik satyp alý tenderlerinde zańbuzýshylyqtar jasaǵany, temirjol qurylysyna qajetti materıaldardy qymbat baǵaǵa satyp alǵany jáne qyzmettik kólik retinde Lexus LX 470 avtokóligin joǵary baǵamen ıelengeni úshin sottalǵan.
