اقتاۋدا پوليتسەيلەر ءجاسوسپىرىمنىڭ ءومىرىن ساقتاپ قالدى. بۇل تۋرالى ىشكى ىستەر مينيسترلىگىنىڭ ءباسپاسوز قىزمەتى جاريالادى، دەپ حابارلايدى "ادىرنا".
بۇگىن ساعات 11:09 شاماسىندا اقتاۋ قالاسىنىڭ تەڭىز جاعالاۋىندا پوليتسيا قىزمەتكەرلەرىنە تەڭىز ورتاسىنا قاراي بەت العان، اينالاسىنداعىلارعا ءمان بەرمەگەن ءجاسوسپىرىم تۋرالى حابار ءتۇستى.
وقيعا ورنىنا دەرەۋ جەتكەن اقتاۋ قالاسى پوليتسيا باسقارماسىنىڭ پاترۋلدىك پوليتسيا باتالونىنىڭ قىزمەتكەرلەرى ابدۋراحيم ساتەشوۆ جانە ازامات قارابالاەۆ جاعدايدىڭ اسا قاۋىپتى ەكەنىن كورىپ، ءبىر ءسات تە كىدىرمەستەن تەڭىزگە سەكىرگەن.
وزدەرىنىڭ جەكە قاۋىپسىزدىگىن ەلەمەي، ولار ءجاسوسپىرىمدى جاعاعا الىپ شىعىپ، بالانىڭ ءومىرىن ساقتاپ قالدى. پوليتسيا قىزمەتكەرلەرىنىڭ شۇعىل ءارى باتىل ارەكەتتەرىنىڭ ارقاسىندا قايعىلى جاعدايدىڭ الدىن الۋ مۇمكىن بولدى.
قازىرگى ۋاقىتتا ءجاسوسپىرىمنىڭ جاعدايى قاناعاتتانارلىق، ءومىرى مەن دەنساۋلىعىنا قاۋىپ جوق. جاسوسپىرىممەن پروفيلاكتيكالىق اڭگىمە جۇرگىزىلىپ جاتىر.
پوليتسيا قىزمەتكەرلەرى كۇن سايىن ازاماتتاردىڭ قاۋىپسىزدىگىن قامتاماسىز ەتىپ، كەز كەلگەن جاعدايدا، ءتىپتى ءوز ءومىرىن قاتەرگە تىگە وتىرىپ، كومەك كورسەتۋگە دايىن.
ۇقساس جاڭالىقتار
