3 ناۋرىزدا اقتاۋ قالاسى اكىمىنىڭ ورىنباسارى بولىپ تاعايىندالعان اسەت شوپانوۆ 4 ناۋرىزدا ءوز ەركىمەن قىزمەتتەن كەتكەن، دەپ حابارلايدى "ادىرنا" ۇلتتىق پورتالى.
اقتاۋ اكىمدىگىنىڭ ءباسپاسوز قىزمەتى بۇل اقپاراتتى راستادى.
اسەت شوپانوۆ – ش. ەسەنوۆ اتىنداعى اقتاۋ مەملەكەتتىك ۋنيۆەرسيتەتىنىڭ تۇلەگى. ول 2002 جىلى بەينەۋ اۋدانى اكىمى اپپاراتىنىڭ باس مامانى رەتىندە ەڭبەك جولىن باستاعان.
2003-2018 جىلدارى بەينەۋ اۋدانى اكىمدىگىندە ءارتۇرلى قىزمەتتەر اتقارعان. 2018-2020 جىلدارى ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىندا قىزمەت ەتكەن. 2020-2022 جىلدارى باسقارما باسشىسىنىڭ ورىنباسارى بولدى. 2022-2024 جىلدارى باسقارما باسشىسى قىزمەتىن اتقاردى.
جەرگىلىكتى باق دەرەگىنشە، 2024 جىلدىڭ مامىر ايىندا اسەت شوپانوۆ ماس كۇيىندە كولىك جۇرگىزگەنى ءۇشىن ۇستالعان.
سوت شەشىمى بويىنشا قر اقبتك-ءنىڭ 608-بابىنىڭ 1-بولىگى بويىنشا كىنالى دەپ تانىلدى. ول 15 تاۋلىككە قاماۋعا الىنىپ، 7 جىلعا جۇرگىزۋشى كۋالىگىنەن ايىرىلدى. ماڭعىستاۋ وبلىسى اكىمدىگى وعان قاتاڭ سوگىس تۇرىندەگى تارتىپتىك جازا قولدانعان.
اسەت شوپانوۆتىڭ نەلىكتەن قىزمەتىنەن كەتكەنى تۋرالى رەسمي اقپارات جوق.
ۇقساس جاڭالىقتار
