رەسپۋبليكا كۇنىنە وراي اقتاۋ قالاسىنداعى نازارباەۆ زياتكەرلىك مەكتەبىنىڭ «قوس پەرنە» دومبىراشىلار ءانسامبلىنىڭ قاتىسۋىمەن «SAYAPARK» ويىن-ساۋىق كەشەنىندە «ۇلت رۋحى – دومبىرا ءۇنى» اتتى دومبىراشىلار فلەشموبى ءوتتى.
ۇلتتىق ونەردى ۇلىقتاۋعا باعىتتالعان تاعىلىمدى شاراعا 100-گە جۋىق دومبىراشى قاتىسىپ، قازاقتىڭ كۇي ونەرىنە دەگەن قۇرمەتىن كۇي تىلىمەن جەتكىزدى. دومبىرانىڭ قوس ىشەگىنەن توگىلگەن اۋەندەر ساۋدا-ويىن-ساۋىق كەشەنىنە جينالعان قالا تۇرعىندارى مەن اتا-انالارعا ەرەكشە كوڭىل كۇي سىيلاپ، ۇلتتىق مادەنيەتتىڭ قۇدىرەتىن تاعى بىرمارتە سەزىندىردى.
فلەشموب بارىسىندا قازاقتىڭ ءداستۇرلى كۇيونەرىنىڭ ءىنجۋ-مارجاندارى ورىندالدى. اتاپ ايتقاندا، حالىق كۇيلەرى «جاستار ءبيى»، «كەلىنشەك»، «كەڭەس»، «تەپەڭكوك»، نۇرعيسا تىلەنديەۆتىڭ «اتاتولعاۋى»، ءابدىمومىن جەلدىباەۆتىڭ «ەركەسىلقىمى» جانە قۇرمانعازى ساعىربايۇلىنىڭ«اداي» كۇيى شىرقالدى.
قازاقستان رەسپۋبليكاسى پرەزيدەنتى قاسىم-جومارت توقاەۆ بەكىتكەن ىشكى ساياساتتىڭ نەگىزگى قاعيداتتارىنىڭ ءبىرى – «ادال ازامات» قاعيداتى ۇلتتىق قۇندىلىقتاردى دارىپتەۋدى، وتانشىلدىق پەن جاۋاپكەرشىلىكتى قالىپتاستىرۋدى كوزدەيدى. وسى تۇرعىدا دومبىراشىلار فلەشموبى جاس ۇرپاقتىڭ ۇلتتىق مادەني مۇراعا قۇرمەتىن ارتتىرىپ، قازاق ونەرىن ساقتاۋ مەن ونى كەلەر ۇرپاققا جەتكىزۋگە دەگەن جاۋاپكەرشىلىگىن نىعايتۋعا باعىتتالعان مادەني باستاما بولىپ تابىلادى.
