ماڭعىستاۋ وبلىسىنىڭ پوليتسياسى جەڭىل اۆتوكولىكتەردى جالعا الۋعا 313 ميلليون تەڭگە جۇمساۋعا دايىن، دەپ "ادىرنا" ءتىلشىسى قازتاگ اگەنتتىگىنە سىلتەمە جاساپ حابارلايدى.
مۇنايلى ولكەنىڭ ءتارتىپ ساقشىلارى جەڭىل اۆتوكولىككە ميلليونداعان قاراجات بولمەك. مەملەكەتتىك ساتىپ الۋ پورتالىندا:
"تاپسىرىس بەرۋشى – "قازاقستان رەسپۋبليكاسى ىشكى ىستەر مينيسترلىگى ماڭعىستاۋ وبلىسىنىڭ پوليتسيا دەپارتامەنتى" مم; اتاۋى – جەڭىل اۆتوموبيلدەردى جالعا الۋ بويىنشا قىزمەتتەر; قوسىمشا سيپاتتاماسى – جۇرگىزۋشىسىز جەڭىل اۆتوكولىكتى جالعا بەرۋ بويىنشا قىزمەتتەر. جوسپارلى سوماسى - 312 857 142,86 تەڭگە", - دەپ كورسەتىلگەن.
وتىنىمدەردى الدىن الا قابىلداۋ مەرزىمى 14-29 جەلتوقسان ارالىعى. بۇل رەتتە تەحنيكالىق قۇجاتقا سايكەس ساتىپ الۋدا كورسەتىلگەن جوسپارلى سوما 2023 جىلدىڭ 1 قاڭتارى مەن 31 جەلتوقسانى ارالىعىنداعى كەزەڭگە بولىنگەن.
ياعني، بەلگىلەنگەن سومانى يگەرۋگە ەكى كۇن عانا قالۋى مۇمكىن – 30 جانە 31 جەلتوقسان. تەحنيكالىق سيپاتتاما: "ەگەر شارت 2023 جىلعى 1 قاڭتاردان كەيىن كەش جاسالعان جاعدايدا تاپسىرىس بەرۋشى شارتتىڭ جالپى سوماسىن ازايتۋعا مىندەتتى" دەگەن ءبولىم جازىلعان.
قۇجاتتا "ماڭعىستاۋ وبلىسى پوليتسيا دەپارتامەنتىنىڭ قاجەتتىلىكتەرى ءۇشىن جۇرگىزۋشىسىز اۆتوكولىك قۇرالدارىن جالعا الۋ بويىنشا" 73 كولىكتى جالعا الۋ قۇنى 312 857 142,86 تەڭگە دەپ كورسەتىلگەن.
ەسكە سالا كەتەيىك، ماڭعىستاۋ وبلىسىنىڭ پوليتسيا دەپارتامەنتى 2022 جىلعا اۆتوكولىكتەردى جالعا الۋ بويىنشا ەكى لوتتان تۇراتىن جالپى سوماسى 555 ملن تەڭگەگە بايقاۋ جاريالاعان بولاتىن.
